Rriten shpenzimet për armët bërthamore – Gjatë vitit të kaluar, 10 miliardë euro më shumë në të gjithë botën

Fushata Ndërkombëtare për Shfuqizimin e Armëve Bërthamore – ICAN, raportoi një rritje prej 10 miliardë euro në shpenzimet globale për armët bërthamore në vitin 2023 krahasuar me vitin 2022.

Nëntë shtetet që kanë armë bërthamore vazhdojnë të modernizojnë armët e tyre bërthamore. Në fillim të këtij muaji, Rusia dhe aleati i saj Bjellorusia nisën një fazë të dytë të stërvitjeve që synojnë trajnimin e trupave të tyre me armët taktike bërthamore, pjesë e përpjekjeve të Kremlinit për të dekurajuar Perëndimin nga rritja e mbështetjes për Ukrainën.

Në një raport të veçantë, Fushata Ndërkombëtare për Shfuqizimin e Armëve Bërthamore, ICAN, tha se nëntë shtetet e armatosura bërthamore shpenzuan një total prej 85.4 miliardë eurosh për arsenalet e tyre në vitin 2023.

Grupi tha se shifrat tregojnë një rritje prej 10 miliardë eurosh në shpenzimet globale për armët bërthamore në 2023 krahasuar me vitin 2022, me Shtetet e Bashkuara që përbëjnë 80% të kësaj rritjeje. Shpenzuesi tjetër më i madh ishte Kina me 11 miliardë euro, me Rusinë që shpenzoi shumën e tretë më të madhe me 7.7 miliardë euro.

Rusia dhe Shtetet e Bashkuara kanë së bashku pothuajse 90% të të gjitha armëve bërthamore. Përmasat e rezervave të tyre ushtarake duket se kanë mbetur relativisht të qëndrueshme në vitin 2023. Transparenca në lidhje me forcat bërthamore ka rënë në të dy vendet pas pushtimit të plotë të Ukrainës nga Rusia në shkurt 2022.

Në Azi, India, Pakistani dhe Kore të Veriut po ndiqet e njëjta rrugë duke siguruar sa më shumë raketa balistike. Shtetet e Bashkuara, Rusia, Franca, Britania e Madhe dhe Kina e kanë tashmë atë kapacitet, duke mundësuar një rritje të shpejtë potenciale të armëve të dislokuara, si dhe mundësinë që vendet e armatosura bërthamore të kërcënojnë shkatërrimin e shumë më shumë objektivave.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.