Rrjeti 6G pritet të jetë gati deri në 2029-2030 – Duhen më shumë investime për shpërndarjen e 5G në Europë

Kristi Ceta/SCAN

 

Operatorët e telekomunikacionit të BE-së presin që standardet 6G për gjeneratën e ardhshme të rrjeteve celulare të jenë gati deri në 2029-2030, sipas Jan Ellsberger, drejtorit të ri të përgjithshëm të organit evropian të standardizimit ETSI.

Ellsberger, një ish-zëvendës president në kompaninë suedeze të telekomit Ericsson tha se puna përgatitore për këtë do të fillojë së shpejti. Kjo vjen pasi objektivat aktuale të Komisionit Evropian për vendosjen e 5G në të gjithë bllokun mbeten të paplotësuara nga 27 vendet anëtare të BE-së. Ai shtoi se 6G nuk do të thotë një revolucion i madh, por përkundrazi, “një evolucion i qetë” i 5G.

ETSI ka më shumë se 950 organizata anëtare në 65 vende të ndryshme dhe ka për detyrë të vendosë standarde të zbatueshme globalisht. Kjo është një nga organizatat që drejton standardizimin global të telekomunikacionit brenda 3GPPP (Third Generation Partnership Project), një konsorcium global që zhvillon protokolle për telekomunikimet celulare.

Pasi specifikimet e 6G të jenë gati, ato do të transferohen në standarde në të gjitha rajonet pjesëmarrëse: BE, SHBA, Indi, Japoni, Kinë dhe Korenë e Jugut.

Në raportin e fundit, Komisioni tha se objektivi i tij për 2023 për të arritur mbulimin universal 5G mbetet i paplotësuar. Një zyrtar i BE-së paralajmëroi në janar se përhapja e ulët e vendosjes së 5G në Evropë do të thotë se teknologjitë e tjera që varen nga interneti i shpejtë, si inteligjenca artificiale, do të përballen me vonesa në përdorim. Gjithashtu nevojiten ende investime të rëndësishme shtesë në shpërndarje përpara se të arrihen objektivat e BE-së për të arritur mbulimin e plotë 5G dhe gigabit deri në fund të kësaj dekade.

Një nga shembujt që doli nga Komisioni i fundit është akti i inteligjencës artificiale dhe rregullat e rrepta të bllokut për të kufizuar aplikacionet me rrezik të lartë, të cilat u bënë të zbatueshme në fillim të këtij muaji. Në listën e prioriteteve janë gjithashtu teknologjitë e reja, duke përfshirë atë kuantike, si dhe zhvillimin e iniciativave rreth aftësive për të trajnuar brezin e ardhshëm.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.