Rumania, mbi 800 mln euro për energjinë e gjelbër – Plani i qeverisë synon të mbështesë autoritetet lokale dhe sistemet e ngrohjes

Kristi Ceta/SCAN

 

Rumania ka hartuar një program për autoritetet lokale dhe sistemet e ngrohjes qendrore për të investuar në energjinë e gjelbër dhe në rritjen e efikasitetit të saj.

Plani do të zbatohet në periudhën 2024-2030 dhe është një investim prej 804 milionë eurosh. Sipas njoftimit, qëllimi i skemës është të mbështesë autoritetet lokale dhe operatorët e sistemeve të ngrohjes qendrore.

Bashkitë kanë nevojë për financim të rregullt për të siguruar energji të sigurt, të përballueshme dhe të gjelbër për qytetarët, si dhe për të rritur cilësinë e jetës në komunitetet e tyre, shtoi Ministria e Energjisë.

Rumania nuk mund të mbështetet vetëm në financimin e Bashkimit Evropian, kështu që qeveria ka vendosur të prezantojë një program shumëvjeçar përmes të cilit institucionet publike dhe prodhuesit e nxehtësisë do të jenë në gjendje të financojnë projekte për energjinë e gjelbër dhe eficencën e energjisë. Gjithashtu investimi do të shërbejë për ndërtimin, modernizimin dhe zhvillimin e sistemeve të ngrohjes dhe ftohjes qendrore, tha ministria.

Mekanizmi do të përbëhet nga dy komponentë dhe do të financohet nga emetimet e bonove të gjelbra që po përgatit Ministria e Financave. Segmenti i parë vlerësohet në 301.4 milionë euro dhe vlen për komunat e përfshira në programin e Misionit të BE-së për Qytetet Neutrale ndaj Klimës për 100 autoritete lokale deri në vitin 2030.

Fondet do të përdoren për masat e energjisë së gjelbër dhe eficencës së energjisë, të miratuara nga Komisioni Evropian, nga planet e veprimit të qyteteve për klimën, shpjegoi ministria.

Pjesa tjetër, 502.4 milionë euro, është e destinuar për autoritetet lokale dhe sistemet e ngrohjes qendrore. Programi përfaqëson një hap të rëndësishëm në tranzicionin e Rumanisë drejt një sistemi energjie të sigurt, të përballueshëm dhe të gjelbër.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.