Shitjet e makinave të reja në BE u rritën me 13.7% – Volkswagen, Stellantis dhe Renault regjistruan rezultatin më të mirë

Shitjet e makinave të reja në Bashkimin Evropian u rritën me 13.7% në prill në krahasim me një vit më parë. Sipas organit evropian të industrisë së automobilave, ky ndryshim shënoi rritjen e tyre më të madhe që nga tetori i kaluar.

Shoqata Evropiane e Prodhuesve të Automjeteve (ACEA) tha se një rritje në tregjet kryesore Spanjë, Gjermani, Francë dhe Itali nxiti rritjen, ndërsa një Pashkë e hershme shtoi dy ditë shtesë shitje në muaj.

Prodhuesit kryesorë evropianë të makinave po vënë baste që shitjet e makinave të rriten gjatë vitit, pavarësisht paralajmërimit se tregu do të jetë i vështirë për shkak të ngadalësimit të rritjes së shitjeve të automjeteve elektrike dhe rritjes së konkurrencës kineze, ndërkohë që konsumatorët po luftojnë me norma të larta interesi.

Sipas të dhënavë të Shoqatës Evropiane të Prodhuesve të Automjeteve, shitjet e makinave elektrike me bateri në prill u rritën me 14.8% nga një vit më parë, ndërsa ato të makinave hibride-elektrike u rritën me 33.1%.

Automjetet e elektrizuara, qofshin modele plotësisht elektrike, hibride plug-in ose hibride të plota, të shitura në Bashkimin Evropian përbënin 47.8% të të gjitha regjistrimeve të makinave të reja të pasagjerëve në prill, nga 44.1%  që ishin një vit më parë.

Regjistrimet e makinave në tre prodhuesit më të mëdhenj të makinave në Evropë, Volkswagen, Stellantis dhe Renault, u rritën me 15.5%, 1.7% dhe 11.0% respektivisht në BE, ndërsa Toyota pa regjistrimet me 47.3%.

Numri i automjeteve të reja të regjistruara në prill në BE, Britani dhe Shoqatën Evropiane të Tregtisë së Lirë (EFTA) u rrit me 12.0% në 1.08 milionë automjete.

Gjigantët evropianë të makinave Volkswagen, Mercedes-Benz dhe Stellantis, të gjithë patën shitje dhe të ardhura më të ulëta në tremujorin e pare. Gjithashtu ata u përballën me kosto më të larta dhe kërkesë më të dobët për makina të reja pasi normat e interesit mbeten të larta, ndërkohë që firmat po shtojnë modelet e reja duke përfshirë këtu makinat elektrike të lira.

Shitja e makinave elektrike hibride, e parë si një kompromis midis atyre me djegie të plotë dhe tërësisht elektrike, është rritur në Bashkimin Evropian muajt e fundit.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.