Sulmi i Iranit ndaj Izraelit “turbullon” tregun e naftës – Çfarë do të ndodhë nëse mbyllet Ngushtica e Hormuzit?

Kristi Ceta/SCAN

 

Sulmi me raketa i Iranit ndaj Izraelit po teston tregun e naftës, me sulmin që ngre shqetësime për ndërprerjet e mundshme të furnizimit nga Lindja e Mesme nëse konflikti përshkallëzohet më tej.

Kryeministri i Izraelit Benjamin Netanyahu ka kërcënuar se do të hakmerret ndaj breshërisë së raketave, duke shtuar rrezikun e intensifikimit të tensioneve. Nafta e papërpunuar Brent u rrit me më shumë se 5% pas sulmit të së martës, përpara se të pakësonte disa nga këto fitime. Nafta u rrit sërish të mërkurën, duke arritur mbi 74 dollarë për fuçi.

Megjithatë, tregu nuk e ka vlerësuar plotësisht rrezikun e një rritjeje të mëtejshme të çmimeve në rast të sulmeve ndaj objekteve të naftës iraniane, ose nëse Teherani bllokon Ngushticën e Hormuzit.

Nafta mund të rritet deri në 7 dollarë për fuçi nëse SHBA dhe aleatët e saj vendosin sanksione ekonomike ndaj Iranit, ose me 13 dollarë nëse Izraeli godet infrastrukturën energjetike iraniane, sipas vlerësimeve paraprake nga Clearview Energy Partners. Një ndërprerje e tregtisë përmes Ngushticës së Hormuzit mund të ketë ndikimin më të madh, duke e çuar çmimin e papërpunuar 13 deri në 28 dollarë më të lartë, sipas analistëve.

Ngushtica e Hormuzit është një rrugë ujore e ngushtë në grykëderdhjen e Gjirit Persik, e cila menaxhon pothuajse 30% të tregtisë botërore të naftës. Thellësia e saj e vogël i bën anijet të pambrojtura ndaj minave dhe afërsia me Iranin i lë cisternat të hapura ndaj sulmeve të raketave apo përgjimeve nga varkat patrulluese.

“Ndërsa Izraeli mund të ketë një avantazh superior ushtarak, Irani mund të përdorë avantazhin e tij gjeografik për të ndërprerë rrugën kryesore të anijeve”, u shprehën strategët e tregut në Singapor. “Në këtë rast, çmimet e naftës do të rriten.”

Në rast të ndërprerjeve të mëdha dhe të zgjatura në Lindjen e Mesme, SHBA pritet të shfrytëzojë rezervën strategjike të naftës. Stoku aktualisht mban rreth 383 milionë fuçi, duke ofruar një mbështetje të konsiderueshme.

Ndërsa rreziku i një konflikti gjeopolitik kthehet, ekziston gjithashtu shqetësimi se çmimet do të rriten, pasi shumë tregtarë qëndrojnë mënjanë duke pritur që situata të qetësohet, duke e lënë tregun më të prekshëm për tregtarët e drejtuar nga algoritmet, që janë shtuar kohët e fundit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.