Tranzicioni i gjelbër në “shpëtim” të ekonomisë – Raporti i Draghit thekson nevojën për uljen e kostove të energjisë

Kristi Ceta/SCAN

 

Raporti i ish-kryeministrit italian Mario Draghi përshkruan mënyrën si shpëtohet ekonomia e Evropës, me fokus të madh në tranzicionin e energjisë së gjelbër.

Raporti ‘E ardhmja e Konkurrueshmërisë Evropiane’ detajon investimet që Evropa duhet të bëjë për të qëndruar në rrugën e duhur me rivalët e saj kryesorë, përkatësisht SHBA-në dhe Kinën.

Jo më pak se një e treta e 328 faqeve të raportit i kushtohen sektorit të energjisë dhe rolit qendror në nxitjen e dekarbonizimit dhe konkurrencës së BE-së.

Për Draghin, rruga drejt neutralitetit ndaj klimës është e gjatë dhe përfshin disa hapa të rëndësishëm. Draghi thekson rëndësinë e mbështetjes për familjet me të ardhura të ulëta, të cilat mund të ndikohen në mënyrë disproporcionale nga kostoja e tranzicionit të energjisë së gjelbër.

Ulja e kostos së energjisë për përdoruesin është një tjetër hap thelbësor. Megjithëse çmimet kanë rënë ndjeshëm, ato janë ende shumë më të larta se në SHBA. Energjia elektrike është dy deri në tre herë më e shtrenjtë në Evropë dhe çmimet e gazit natyror janë katër deri në pesë herë më të larta. Draghi identifikon se disa faktorë që nxisin këto çmime të larta janë mungesa e burimeve natyrore në Evropë, por edhe çështje kyçe që rrjedhin nga struktura e tregut të energjisë.

Gjithashtu, BE-ja duhet të ketë një qasje të koordinuar ndaj krizës energjetike të Evropës. “Ndërhyrjet kombëtare në tregjet e energjisë duhet të kufizohen”, thuhet në raport.

Bashkimi Evropian duhet të trajnojë fuqinë punëtore për nxjerrjen dhe përpunimin e mineraleve kritike. Sipas raportit, furnizimet e brendshme të mineraleve kritike mund të plotësojnë kërkesën e BE-së për disa materiale deri në vitin 2030.

Draghi gjithashtu mbajti një qëndrim të butë ndaj kimikateve të rrezikshme që janë përdorur në produktet e konsumit. Bashkimi Evropian ka propozuar ndalimin e tyre për shkak të ndikimit negativ në shëndetin e njeriut. Ish kryeministri italian e përshkruan propozimin e BE-së si një kufizim në vendosjen e teknologjive të pastra si bateritë dhe elektrolizuesit, duke thënë se “aktualisht nuk ka alternativa”.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.