Turizmi, Shqipëria rrit flotën e mjeteve lundruese – Shifrat/ Qershori arrin vlerën më të lartë të importeve

Elisabeta Dosku/ SCAN

 

Rritja e fluksit të turistëve në Shqipëri ka sjellë edhe rritjen e investimeve në mjete lundruese nga subjektet turistike ne vend. Përgjatë një viti në vendin tonë janë importuar anije, varka dhe strukturat lundruese në vlerën e rreth 1.54 miliardë lekëve, apo 15 milionë eurove .

Nga të dhënat e INSTAT vërehet se në Qershor të 2023-shit janë importuar anije, varka dhe strukturat lundruese në vlerën e 252.5 milionë lekëve dhe përgjatë muajve të tjerë të vitit kjo shifër ka ardhur në rënie, ndërsa në Qershor të vitit aktual ka pësuar sërish një rritje të shpejtë dhe importet kanë arritur në vlerën e 303 milionë lekëve, duke tejkaluar të njëjtën periudhë të një viti më parë.

I njëjti trend është reflektuar dhe në importin e këtyre mjeteve në peshë. Duke marrë parasysh shifrën bëhet fjalë kryesisht për varka lundruese të thjeshta, apo anije peshkimi.

Sipas ligjit në fuqi, furnizohen me karburant (gazoil) për peshkim, pa paguar taksën e qarkullimit, taksën e karbonit dhe akcizën, por duke paguar TVSH-në,  vetëm subjektet e peshkimit (personat juridikë dhe fizikë) me destinacion përdorimi anijet e peshkimit, të cilat kanë marrë statusin e pritësit të regjistruar dhe plotësojnë kushtet e përcaktuara në legjislacionin për akcizat.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.