Unifikim imazhi për fshatrat turistike – FSHZH hap tenderin 142 mln lekë. Përmirësim i peizazhit për të zhvilluar turizmin

Ola Mitre/SCAN

 

Imazhi i fshatrave turistike do të unifikohet, teksa fondi i vënë në dispozicion për këtë qëllim është rreth 142 mln lekë. Fondi Shqiptar i Zhvillimit ka hapur tenderin për kompaninë që do të kryejë punimet, që do të përfshijnë muret rrethues të pronave publike dhe private, zëvendësimin e portave ekzistuese, mobilimin urban me stola dhe kosha, ndërhyrje në fasada, rikualifikimin e hapësirave të pikave panoramike; përmirësimin dhe shtimin e gjelbërimit aty ku është e nevojshme, etj.

Sipas FSHZH, synimi i projektit është përmirësimi i peizazhit urban nëpërmjet krijimit të një ambienti tërheqës e të qëndrueshëm për turizmin, si dhe përmirësimi i ofertës turistike natyrore në destinacione ekzistuese apo të reja me potencial të lartë zhvillimi nëpërmjet ndërhyrjeve diversifikuese, duke përmirësuar eksperiencën turistike.

Sipas FSHZH ky projekt ka si qëllim krijimin e modeleve për rrethime, mure, gardhe, etj., për të rregulluar imazhin e hapësirave publike të fshatrave, por edhe të garantojë sigurinë dhe qëndrueshmërinë e tyre, duke harmonizuar estetikën e instalimeve të reja me bukuritë natyrore dhe trashëgiminë arkitekturore të fshatit.

Po ashtu, synohet krijimi i pikave panoramike si atraksione turistike, që ofrojnë pamje spektakolare dhe përvoja unike për vizitorët. Sipas dokumenteve të tenderit, projekti përfshin zonat bregdetare, duke i konsideruar zona me rëndësi të madhe ekonomike, kulturore dhe ekologjike.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.