“Vala” e automjeteve kineze të prodhuara në Europë – Kompanitë nga Kina po hapin fabrika nga Spanja, në Poloni

Dorina Kurtaj / SCAN

 

Një kërcënim i ri i madh për prodhuesit europianë të makinave janë automjetet elektrike kineze  “made in Europe”. Në një moment që BE rrit tarifat deri në 48%, gjenerata e re kineze e prodhuesve të makinave ‘të gjelbërta’ po bashkëpunon me industrinë vendase të Kontinentit të Vjetër, e cila tani duket se po përballet me një rreth vicioz.

Omoda E5, modeli i ri makinës tërësisht elektrike të Chery, që bashkëpunon me Ebro-EV Motors të Spanjës, është bërë i disponueshëm në Spanjë. Në Poloni, makinat e qytetit T03 të kompanisë kineze Leapmotor dalin nga një linjë montimi në pronësi të prodhuesit të Jeep dhe Fiat Stellantis NV. Gjigandi kinez BYD njoftoi planet për fabrikën e tij në Hungari dhe më pas në Turqi.

Deri në fund të vitit, Chery shpreson të nisë prodhimin në ish-uzinën e Nissan pranë portit të Barcelonës, duke synuar të prodhojë 150.000 makina deri në vitin 2029. Ajo po kërkon gjithashtu një vend të dytë europian.

Ardhja masive e prodhuesve kinezë përbën një kërcënim për gjigantët e automjeteve të Europës, të cilët shpesh nuk kanë zgjidhje tjetër veçse të bashkëpunojnë me rivalët e tyre, ndërsa mbyllin objektet e tyre për t’u përshtatur me rënien e shitjeve globale. Komisioni Europian është ende duke hetuar vendosjen e tarifave nga Pekini për subvencionet shtetërore. Dhe kjo është vetëm një pjesë e një mosmarrëveshjeje tregtare globale, ndërsa dy ekonomitë më të mëdha në botë luftojnë për një industri që po rritet me shpejtësi, pjesërisht falë subvencioneve të Pekinit.

BE ka nevojë për automjete elektrike të lira për të përmbushur objektivin e saj të vitit 2035 për heqjen graduale të shitjeve të makinave me djegie të brendshme, ndërsa prodhuesit kinezë të automjeteve elektrike, të cilët kanë kapur më pak se 10% të tregut evropian deri më tani, po investojnë në rajon pasi shumë kalojnë nga zgjerimi i shpejtë në tregjet e tyre lokale në kapacitet të tepërt.

Megjithatë, shumë qeveri të bllokut prej 27 vendesh anëtare po monitorojnë nga afër përpjekjet për të prodhuar automjete kineze në BE.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.