Franca përgatitet për masa shtrënguese – Kriza pas lojërave olimpike pritet të zgjasë deri në 12 vjet

Dorina Kurtaj / SCAN

 

Franca duhet të bëjë pa vonesë një përpjekje të madhe për të racionalizuar buxhetin e saj, një përpjekje që do të zgjasë shtatë deri në dymbëdhjetë vjet dhe që parashikon një ulje të shpenzimeve. Kjo pa përjashtuar një rritje të taksave ose një ngrirje të rregullimit të përfitimeve të sigurimeve shoqërore.

Kjo është ideja qendrore e mesazhit të dhënë nga Këshilli i vendit për Analizën Ekonomike – CAE, një organ publik i ngarkuar me informimin e kryeministrit.

Studimi i referohet financave publike të vendit të cilat “janë në gjendje të keqe” pasi në vitin 2023 borxhi publik arriti në rreth 110% të PBB-së, ndërsa deficiti buxhetor u rishikua nga 4.9% në 5.5% të PBB-së. Qoftë për të shmangur rritjen e normave të huamarrjes së qeverisë ose për të mbajtur borxhin nën kontroll ose thjesht për të respektuar angazhimet europiane të vendit, qeveritë e ardhshme në mënyrë të pashmangshme do të duhet të merren me problemin.

Tre faktorë mund të ndikojnë në raportin e borxhit ndaj PBB-së: deficiti primar, dmth. bilanci i shpenzimeve dhe të ardhurave qeveritare pa interesat, interesi dhe rritja e PBB-së. Në shënimin e tyre, ekonomistët tregojnë se me kalimin e kohës normat e interesit dhe rritja e PBB-së “anulojnë njëra-tjetrën” në Francë. Me fjalë të tjera, rritja e PBB-së mjafton vetëm për të paguar interesat e kredive për shërbimin e borxhit, ndërsa vetë borxhi, i cili në terma absolutë ka arritur në 3.1 trilion. euro, “nuk është gjë tjetër veçse shuma e deficiteve parësore të pesëdhjetë viteve të fundit”.

Lajmi i mirë, sipas ekspertëve në Këshillin për Analizat Ekonomike, është se Franca është ende në kontroll të borxhit të saj. Lajmi i keq është se ajo nuk mund të llogarisë vetëm në rritjen për të ndaluar rritjen e borxhit të saj, i cili në vitin 1970 arriti vetëm 21% të PBB-së. Që raporti të stabilizohet në nivelin aktual, deficiti primar duhet të zvogëlohet në zero dhe më pas të krijohet një suficit primar. Rasti ngjan me atë të Greqisë.

Ekspertët besojnë se 2.5 miliardë euro në vit mund të kursehen menjëherë nëse zbritjet e taksave për shpenzimet e kërkimit në kompanitë e mëdha franceze do të reduktoheshin.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.