Vlerësimi i BB për modernizimin e ujësjellësve – Progres për kompensimin e klientëve në nevojë dhe auditimin energjetik të ndërmarrjeve

Banka Botërore ka rishikuar vlerësimin e ecurisë së projektit “Programi Kombëtar i Modernizimit të Sektorit të Furnizimit me Ujë dhe Kanalizimeve të Shqipërisë”, në “Mesatarisht të kënaqshëm”, nga “Kënaqshëm” që ishte në vlerësimin e mëparshëm.

Programi financohet nga BB me një vlerë totale prej 78 mln USD, e ndarë në 2 linja kredish prej respektivisht 75 mln USD dhe 3 mln USD, përmes marrëveshjes së grantit rë miratuar nga qeveria shqiptare në 24 mars 2023.

Ndërkaq, në vlerësimin e fundit Banka Botërore vlerëson progresin në reformën e sektorit, në disa pika. Së pari, sipas BB qeveria me mbështetjen e grupit të punës po përparon në mënyrë të kënaqshme në zhvillimin e udhëzimeve të politikave që lidhen me subvencionet për njerëzit në nevojë, teksa AKUK ka përfunduar tashmë miratimin e udhëzimit, që u lançua publikisht.

Kompensimi i sasisë minimale të ujit për familjet në nevojë u përfshi për herë të parë në udhëzimin që përcakton kriteret dhe procedurat për shpërndarjen dhe përdorimin e subvencioneve që marrin ujësjellësit nga buxheti i shtetit për vitin 2024, duke specifikuar se një pjesë e këtyre subvencioneve do të përdoret pikërisht për kompensim për këtë qëllim. Sipas udhëzimit, për kategoritë në nevojë do të zbritet nga fatura vlera për 5 m³/muaj ujë.

Po ashtu, BB vlerëson nënshkrimin e një kontrate për kryerjen e Auditimit të Energjisë në ndërmarrjet e përzgjedhura të ujësjellësit, që do të fillojë zbatimi brenda korrikut 2024. Kjo kontratë ka rëndësi në drejtim të reduktimit të kostotve të energjisë elektrike, duke marrë në konsideratë dhe faktin që ujësjellësit janë konsumatorë të mëdhenj energjie dhe e kanë detyrim ligjor ndërmarrjen e këtij procesi.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.