Zyrë e posaçme për gjurmimin e pasurive të krimit – Akses në të dhëna sekrete për luftimin e pastrimit të parave dhe krimit të organizuar

Zyra e Rikuperimit të Pasurive do të ngrihet si strukturë e posaçme qendrore pranë Drejtorisë së Përgjithshme të Policisë së Shtetit. Kjo zyrë do të gjurmojë të gjitha pasuritë e luajtshme apo të paluajtshme të grupeve kriminale, të cilat mund t’i nënshtrohen sekuestrimit ose konfiskimit nga organet kompetente.

Ministria e Brendshme ka publikuar për konsultim publik projektligjin lidhur me krijimin e Zyrës së Rikuperimit të Aseteve (ZRA), ndër synimet e të cilës është përmirësimi i rezultateve të luftës kundër krimit të organizuar, korrupsionit dhe pastrimit të parave në Shqipëri. Më herët, në Agjendën Kombëtare të Reformave 2024-2027 parashikohej që kjo zyrë të krijohej brenda qershorit të vitit të ardhshëm.

Zyra do të përbëhet nga disa oficerë që do të përzgjidhen nga radhët e punonjësve të policisë, të cilët do të gëzojnë atributet e Policisë Gjyqësore. Ajo do të gëzojë pavarësi operacionale, por do t’i përgjigjet drejtpërsëdrejti Drejtorit të Policisë. Drejtori i Zyrës së Rikuperimit të Aseteve do të emërohet nga Drejtori i Përgjithshëm i Policisë së Shtetit për një mandat pesëvjeçar dhe mund të shkarkohet po me urdhër të tij.

Me qëllim kryerjen e hetimeve të thelluara për pasuritë që lindin nga veprimtaritë kriminale, Zyra e Rikuperimit të Aseteve do të ketë akses në bazën e të dhënave të Policisë së Shtetit, sekrete shtetërore, në regjistrin qendror të llogarive bankare, regjistrin e pronarëve përfitues, si dhe regjistra të tjerë publikë. Kjo zyrë do të shkëmbejë informacion me Agjencinë e Inteligjencës Financiare dhe organe të tjera kombëtare për përmbushjen me sukses të misionit të saj.

Gjithashtu, ZRA do të bashkëpunojë me zyrat e huaja homologe dhe rrjetet ndërkombëtare për rikuperimin e aseteve, të tilla si Rrjeti Evropian i Rikuperimit të Aseteve apo Rrjeti Ndërinstitucional i Rikuperimit të Aseteve Camden. Ajo do të krijohet dhe do të funksionojë në përputhje me kërkesat e Bashkimit Evropian.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.