11 mln shtëpi do të ndriçohen me energji të gjelbër – Ankandi i energjisë ndihmon Britaninë në arritjen e objektivave

Kristi Ceta/SCAN

 

Ankandi i energjisë së rinovueshme të Britanisë së Madhe ka siguruar mjaft projekte të reja të energjisë elektrike të pastër për të furnizuar 11 milionë shtëpi në Mbretërinë e Bashkuar.

Ankandi prej 1.5 miliardë paundësh do të mbështesë gjithsej 131 projekte të reja duke përfshirë fermat me erë, fermat diellore dhe projektet e energjisë baticore pasi qeveria e re rriti sasinë e fondeve në dispozicion në shtatë herë më shumë se shumat e ofruara vitin e kaluar.

Sekretari i Energjisë u shpreh krenar për sigurimin e financimit për 11 milionë shtëpi, duke shtuar se ky është një tjetër hap i rëndësishëm drejt misionit “të gjelbër” deri në vitin 2030.

Pjesa më e madhe e financimit iu dha fermave të reja me erë në det të hapur në ujërat e Mbretërisë së Bashkuar. Kjo mund të çojë në mjaft ferma të reja me erë në det të hapur për të rritur kapacitetin me 5 GW, ose mjaftueshëm energji elektrike të pastër për të furnizuar mbi 3 milionë shtëpi në Mbretërinë e Bashkuar përpara fundit të dekadës.

Megjithatë, ankandi ka siguruar vetëm gjysmën e kapacitetit të erës në det të hapur që nevojitet çdo vit nëse qeveria shpreson të përmbushë objektivat e energjisë së gjelbër për fundin e dekadës, sipas Greenpeace.

Gjithashtu, ankandi dha kontrata për rreth 90 ferma të reja diellore me një kapacitet total prej 3.3 GW dhe 20 ferma të reja me erë tokësore me një kapacitet total prej gati 1 GW. Zhvilluesit e energjisë së baticës siguruan kontrata për gjashtë projekte të reja dhe ferma e erës lundruese më e madhe e planifikuar në botë gjithashtu lidhi një kontratë.

Suksesi i ankandit ishte vendimtar për qeverinë e re që shpreson të arrijë premtimin zgjedhor për të dyfishuar energjinë e erës në tokë, trefishimin e energjisë diellore dhe katërfishimin e erës në det deri në vitin 2030.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.