159.5 mld lekë shpenzime në tremujorin e dytë – Peshën më të madhe e mbajnë shpenzimet publike dhe shërbimi i borxhit

Lidion Kulla/SCAN

 

Shpenzimet e buxhetit të shtetit kanë shënuar një nivel prej 159.5 miliardë lekësh, gjatë tremujorit të dytë të vitit, në rritje me 7.3% krahasuar me të njejtën periudhë të vitit 2023. Ritmi i realizimit të shpenzimeve u përshpejtua në tremujorin e dytë, nxitur kryesisht nga investimet publike, që dhanë një kontribut pozitiv me 1.5 pikë përqindje në zgjerimin e totalit të shpenzimeve. Ndërkohë, në tremujorin e parë të vitit, shpenzimet publike shënuan një rënie prej 5.1 pikë përqindje.

Pavarësisht rritjes së shënuar gjatë tremujorit të dytë, niveli i investimeve publike për gjashtëmujorin e parë ishte rreth 13.8% më i ulët në terma vjetorë, duke reflektuar tkurrjen e tyre përtej sezonalitetit përgjatë tremujorit të parë.

Megjithatë, zëri me kontributin më të lartë në zgjerimin e shpenzimeve në tremujorin e dytë ishin shpenzimet për interesa mbi borxhin e huaj, me 2.3 pikë përqindje, në reflektim të shtimit të portofolit të borxhit në Eurobonde dhe sjelljes sezonale të këtij zëri.

Ndikim pozitiv në zgjerimin e totalit të shpenzimeve e dhanë edhe ato për personelin dhe skemën e pensioneve, por në masë më të ulët se në tremujorin paraardhës. Shpërndarja e shpenzimeve për interesa mbi borxhin e huaj nuk ka qenë e njëjtë përgjatë vitit. Referuar të dhënave historike, zakonisht pesha më e madhe e shërbimit të borxhit është në tremujorin e dytë dhe të katërt të çdo viti fiskal.

Ndërkohë, për gjysmën e parë të vitit, niveli i shpenzimeve rezultoi në 291.4 miliardë lekë, ose 6.4% më i lartë, krahasuar me të njëjtën periudhë të një viti më parë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.