25 milionë lekë për maturën shtetërore – QSHA: 116 lekë/test pagesa për mësuesit, 50 teste në ditë

25 milionë lekë ka shpenzuar shteti shqiptar nga buxheti për maturën shtetërore 2021-2022.  Një buxhet i cili do të përfshijë shpenzime të ndryshme duke filluar nga pagesat e mësuesve vëzhgues dhe deri tek korrigjimet e testeve të mbi 30 mijë maturantëve të vendosur në 167 qendra provimi.

Sipas të dhënave të Qendrës së Shërbimeve Arsimore të bëra të ditura për SCAN TV 877 mësues do të angazhohen për korrigjimin e 31 mijë e 122 testeve.  Përkatësisht 189 për lëndën e gjuhës së huaj, 209 për gjuhë letërsinë, 168 për matematikën dhe 311 për provimet me zgjedhje.

Por sa paguhet një mësues për korrigjimin e testeve të maturë shtetërore?

Për këtë pyetje qendra e shërbimeve arsimore deklaron se pagesa bruto për vlerësimin e një testi është 116.67 lekë. Në ditë një mësuesi i duhet të korrigjoj deri në 50 teste përveç rishikimeve. Për një ditë një mësues rezulton të paguhet 5800 lekë dhe për një cikël testesh të një provimi prej 4 ditësh rezulton në 23.200 lekë.

Por nga ana tjetër sipas VKM nr.175 një mësues duhet të korrigjojë 3 teste në orë ose e thënë ndryshe për 8 orë 24 teste në ditë. QSHA  e pyetur nga SCAN TV  nëse kjo gjë është cilësore teksa mësuesit bëjnë një punë dyfish përgjigjet duke thënë se  që nga viti 2006 kur u krijua matura shtetërore për herë të parë e deri më sot janë konsoliduar praktika të tilla  ku ka rezultuar që korrigjimi deri në 50 teste në ditë të jetë cilësor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.