94% e depozitave bankare të siguruara, rritje 5% në 2022 – Agjencia: Vlera e depozitave të sigurueshme arriti 1,425 mld lekë, rreth 14 miliardë dollarë

Ndërsa viti 2022 ka qenë një vit sfidues për sistemet financiare, është rritur me 5% niveli i depozitave të siguruara në bankat shqiptare. Agjencia e Sigurimit të Depozitave raporton se në fund të vitit 2022, vlera e depozitave të sigurueshme që përfitojnë nga skema e sigurimit të depozitave arriti 1,425 miliardë lekë, afërisht 14 miliardë dollarë, duke përfaqësuar 94% të totalit të depozitave. Krahasuar me një vit më parë këto depozita u rritën me 5%, ndërsa rritja në vlerë absolute është 67.8 mld lekë, apo afërisht 670 milionë dollarë.

Sipas të dhënave zyrtare të Agjencisë, Peshën më të madhe të totalit të depozitave të sigurueshme për fundin e dhjetorit 2022, e zënë ato në euro, të cilat, të shprehura në kundërvlerën në lek zënë 48.2% të këtij totali, ndjekur nga depozitat në lekë me peshë 45.7%, dhe depozitat në USD, me kundërvlerën e tyre në lekë, me 4.2%. Depozitat e sigurueshme përfshijnë depozitat me afat, llogaritë rrjedhëse, llogaritë e kursimit, llogaritë e kartave, llogaritë e përbashkëta dhe produkte të tjera të ngjashme.

Depozitat e sigurueshme të individëve  në sistemin bankar më 31 dhjetor 2022 arritën 1,161.5 mld lekë, dhe përbëjnë pjesën më të madhe të totalit të depozitave të sigurueshme, konkretisht 82 % të tyre (norma e ndryshimit vjetor ishte +4.4%). Peshën më të madhe të depozitave të sigurueshme të individëve e zënë depozitat në lekë me 48%, ndjekur nga depozitat ne euro me 46%.

Gjatë vitit 2022 ecuria e depozitave të individëve në lekë ka qenë pozitive gjatë gjithë muajve të vitit me përjashtim të një rënieje të lehtë në muajt mars, korrik e gusht. Normat e ndryshimit mujor kanë qenë relativisht të ulta, dhe rritja më e madhe u shënua në muajin qershor me 0.9%. Ndikimin në rritjen vjetore prej 4.4% të depozitave të sigurueshme të individëve, e kanë dhënë depozitat në euro.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.