Franca përjeton dimrin më të thatë prej dekadash – Vendi, në gjendje alarmi për shkak të mungesës së reshjeve

Franca po përballet me thatësirë rekord pas më shumë se 60 viteve, si pasojë e mungesës së reshjeve gjatë dimrit. Pas një muaji pa reshje të konsiderueshme, vendi është tashmë në gjendje alarmi. Zyrtarët lokalë do të mblidhen javën e ardhshme për të vlerësuar situatën për cdo territor sipas deklaratës së ministrit francez të tranzicionit ekologjik.

Viti i kaluar ishte viti më i nxehtë i regjistruar në Francë, sipas agjencisë kombëtare të motit Météo-France. Por temperatura rekord u shënuan në vende të tjera të Europës si në Mbretërinë e Bashkuar, Spanjë dhe Itali. Temperaturat e nxehta shkaktuan kushte thatësire nga të cilat shumë rajone ende nuk janë rimëkëmbur. Reshjet e borës në Alpet italiane janë ulur me 53% dhe nivelet e ujit në pellgun Po të lumit më të madh të Italisë janë 61% nën normalen, sipas studiuesve.

Një gjendje e jashtëzakonshme u shpall korrikun e kaluar në pesë rajone veriore që rrethojnë lumin Po për shkak të thatësirës së vitit 2022. Baticat e ulëta në Venecia kanë bërë që gondolat dhe taksitë e ujit të mos jenë në gjendje të lëvizin për shkak të kanaleve me baltë dhe themelet e ndërtesave në Kanalin e Madh tashmë janë të ekspozuara.

Muajin e kaluar, një raport i publikuar nga “Nature Climate Change” paralajmëroi se Alpet, vargmali më i rëndësishëm malor i Europës për furnizimin e lumenjve, kishin regjistruar një reduktim prej 5.6% në kohëzgjatjen e mbulesës së borës për dekadë gjatë 50 viteve të fundit.

Thatësira në Itali ka ngritur pikëpyetje se si do të menaxhohen krizat e ujit, të cilat ekspertët thonë se do të bëhen më të shpeshta për shkak të ndryshimeve klimatike. Grupi italian i mjedisit Legambiente i ka bërë thirrje qeverisë për të rënë dakord për një strategji kombëtare të ujit.

Në Francë, ministri i tranzicionit ekologjik tha se kufizime “të buta” mund të vendosen pas takimit të së hënës së ardhshme me drejtuesit lokalë, që do të hyjnë në fuqi në mars për të shmangur “situatat katastrofike” gjatë muajve të verës. Mbulesa e borës në Pirenej dhe Alpe ishte gjithashtu dukshëm më e ulët se normalja gjatë një periudhe që konsiderohet vendimtare për rimbushjen e rezervave ujore nëntokësore të Francës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.