Taksë e “kripur” mbi banesat e tokën bujqësore – Ibrahimaj: Si do të përcaktohet vlera e tregut mbi të cilën llogaritet tarifa

Shqiptarë do të paguajnë taksë të kripur mbi banesat që kanë në pronësi dhe tokat bujqësore, e cila do të llogaritet mbi vlerën e tregut. E pranishme në konferencën “Financat Vendore 2022”, Ministrja e Financave Delina Ibrahimaj sqaroi se si do të veprohet për të llogaritur vlerën e tregut në të gjitha bashkitë.

“Synohet qe te rritet ndjeshëm taksa mbi pasurinë qe do te ndikoje ne te ardhurat e te gjithë bashkive.  Taksa për banesat do te hyjë në fuqi në 2026-ën dhe për tokat bujqësore në 2028. Përmes ligjit do duam qe taksa mbi pasurinë te jete mbi vlerën reale dhe jo çmimet e referencës. Vlera reale do kalkulohet nga drejtoria e kadastrës fiskale, por duke qene se është taksë qe do mblidhet nga ju, duhet bashkëpunim për mbledhjen e saj ne te gjithë vendin”.

Nga ana tjetër, ministrja Ibrahimaj foli edhe për situatën financiare në të cilën ndodhen bashkitë, ku theksoi se deri më 31 korrik, njësitë duhet të paraqesin një plan masash që synojnë përmirësimin e saj.

“Deri me 31 korrik presim një plan masash nga secila bashki qe synon përmirësimin e situatës se tyre financiare. Vlerësimi i vitit të ardhshëm do të bëhet mbi faktin dhe jo planin. Do incentivojmë mbështetjen e bashkive qe kane performancë më të mirë.

Gjatë vitit 2022 situata financiare për disa bashki të vendit ka ardhur në përmirësim, ndërkohë që ka ende pune për ato bashki që kanë akumuluar një vlerë të lartë të detyrimeve të prapambetura.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.