Garancia për kontratat koncesionare – Projektligji i deputetit të PS: Të ndahet në 2 pjesë, lehtësohet barra për kompanitë

Deputeti i Partisë Socialiste Laert Duraj ka propozuar ndryshime në ligjin “Për koncesionet dhe partneritetin public-privat”, që kanë si qëllim ndryshimin e pagesave të garancive nga ana e kompanive që shpallen fituese të këtyre kontratave. Sipas dokumentit të depozituar në kuvend, në fokus janë kryesisht kontratat për punë publike, që përveç ndërtimin përfshijnë edhe sigurimin e shërbimeve.

Sipas relacionit shoqërues, kërkohet që vlera për sigurimin e kontratës të ndahet në 2 pjesë, dhe fillimisht të paguhet garancia për vlerën e investimit. Ndërkohë që, vlera e garancisë për shërbimet të paguhet në momentin që përfundon investimi.

Deputeti e argumenton këtë ndryshim me nevojën për lehtsimin e operatorëve ekonomikë, për të mos iu krijuar pengesa dhe barrë të shtuara gjatë gjithë procesit të koncesionit, si dhe të kenë akses sa më të thjeshtë dhe jodiskriminues.

Kjo edhe për faktin se vlerat e këtyre kontratave janë shumë të larta. Sipas legjislacionit në fuqi, sigurimi i kontratës është deri në 5 % të vlerës së kontratës dhe përcaktohet në dokumentet e tenderit. Kjo masë mund të reduktohet në mënyrë përpjesëtimore gjatë ekzekutimit të kontratës, por, në asnjë rast, gjatë kohëzgjatjes së saj, nuk mund të jetë më e vogël se 25 % e vlerës fillestare të sigurimit.

Ndërkaq, një ndryshim tjetër që kërkohet në ligj lidhet me kontrata koncesionare për ndërtimin e hidrocentraleve. Duraj propozon që dispozitat e ligjit të mos zbatohen për ndërtimin dhe shfrytëzimin e burimeve të energjisë së rinovueshme, sipas përcaktimeve të ligjit “Për burimet e rinovueshme të energjisë”, përveç hidrocentraleve, duke hequr parashikimin aktual për ato vepra energjetike me kapacitet të instaluar mbi 2 MW.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.