Euro gjen stabilitet në tregun e brendshëm – Dollari bie lehtë, por zvogëlohet marzhi i tregtimit me lekun

Euro po shfaqet e qëndrueshme edhe në sesionin e sotëm, në tregun e brendshëm valutor, pak a shumë në të njëjtat vlera të një dite më parë, ndërsa dollari amerikan është dobësuar lehtë.

Sipas agjencisë së këmbimit valutor, Iliria 98, euro blihet me 103.5 dhe shitet me 104.3 lekë, dollari amerikan blihet me 94.1 dhe shitet me 95.1 lekë, franga blihet me 110.4 dhe shitet me 111.4 lekë, ndërsa paundi britanik blihet me 120 dhe shitet me 121 lekë.

Ulja e marzhit të tregtimit, ose diferencës mes çmimit të blerjes dhe shitjes së euros, tregon se nuk priten luhatshmëri dhe aktorët e këtij tregu nuk janë në panik.

Ndërkohë, në tregjet ndërkombëtare dollari amerikan po qëndron në rënie të lehtë në sesionin e sotëm, pasi tregtarët janë në pritje të të dhënave mbi inflacionin në SHBA, për të parë nëse bastet për 5 ulje të normave të interesit nga Rezerva Federale, gjatë këtij viti, janë të justifikuara.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.2. Dollari ra gjatë muajve të fundit të vitit 2023, pasi Rezerva Federale sinjalizoi se kishte përfunduar ciklin e rritjes së interesave.

Tregu pret se banka qendrore amerikane do ta ulë normën bazë të interesit me të paktën 140 pikë bazë, gjatë këtij viti, dhe ulja e parë mund të vijë në muajin mars. Euro po këmbehet në rreth 1.0980 dollarë, në rritje me rreth 0.1%, ndërsa paundi ka fituar 0.2% të vlerës dhe po tregtohet në rreth 1.2770 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.