FMN, apel Francës dhe Italisë: “Shtrëngoni rripat!” – Perspektiva për Europën, ku qëndron Gjermania?!
Italisë dhe Francës do t’u duhet të reduktojnë shpenzimet më shpejt se sa është planifikuar aktualisht për të mbajtur nën kontroll borxhin e tyre, ndërsa Gjermanisë do t’i duhet të lirojë zinxhirët e saj për të ringjallur rritjen. Paralajmërimi i qartë është bërë nga Fondi Monetar Ndërkombëtar.
Ministrat e Financave nga e gjithë bota u takuan në Uashington javën e kaluar për të krahasuar vlerësimet dhe dëgjuar nga ekspertët e FMN-së dhe Bankës Botërore mbi një sërë çështjesh që variojnë nga politika fiskale tek rritja globale dhe ndihma për vendet më të varfra.
Ndërsa këshillat e FMN-së nuk janë të detyrueshme për vendet që nuk marrin ndihmën e saj, mendimet e saj të fundit për Italinë, Francën dhe Gjermaninë ka të ngjarë të sjellin kujtime të pakëndshme të krizës së borxhit të dekadës së fundit.
Në perspektivën e saj për Europën, FMN u shpreh se ekonomitë e përparuara europiane me nivele relativisht të larta borxhi duhet të zbatojnë konsolidim fiskal më të rëndësishëm dhe më të ngarkuar nga sa parashikohet nga politikat aktuale të autoriteteve, si për shemmbull Belgjika, Franca dhe Italia.
Shefi europian i huadhënësit global, Alfred Kammer, tha se qeveria italiane duhet t’i japë fund një nxitjeje “joefektive” për rinovimin e shtëpive, të njohur në vend si Superbonus, që aktualisht pritet të hiqet gradualisht deri në fund të vitit të ardhshëm.
Franca, nga ana tjetër, mund të korrë një “kthim të rëndësishëm” nëse do të çlirohej nga subvencionet e energjisë që u vendosën pas pushtimit rus të Ukrainës në vitin 2022, shtoi Kammer. Gjermania, nga ana tjetër, kishte “hapësirë fiskale” për të investuar në dixhitalizimin dhe infrastrukturën publike dhe për të mbështetur kërkimin dhe zhvillimin e kompanive.
FMN vlerëson se Gjermania mund të rrisë frenimin e borxhit, i cili kufizon deficitin buxhetor, nga 0.35% e prodhimit të brendshëm bruto në 1.35%, duke ulur raportin e borxhit ndaj PBB-së.
Italia pret një deficit buxhetor prej 4.3% të PBB-së këtë vit, 3.7% vitin e ardhshëm dhe 3% në 2026, megjithëse ministri i financave të vendit tha se shumë do të vareshin nga rregullat e reja fiskale të Bashkimit Europian.
Franca e ngriti parashikimin e saj të deficitit javën e kaluar në 5.1% të PBB-së dhe tha se do të kërkonte 10 miliardë euro shtesë në shkurtime buxhetore. Parisi ka hequr gradualisht shumë nga subvencionet e tij të kostos së jetesës, por kredia tatimore për faturat e energjisë elektrike të përdorura për të kufizuar çmimet e energjisë elektrike është hequr vetëm pjesërisht dhe do të hiqet plotësisht në shkurt 2025.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.