Greqia “gjen” punëtorë në Egjipt – Rreth 5.000 të tillë do të punojnë në sektorin e bujqësisë

Greqia do të fillojë të sjellë punëtorë nga Egjipti këtë verë për punë të përkohshme bujqësore sipas një marrëveshjeje midis vendeve për të trajtuar mungesën e fuqisë punëtore, tha Ministria e Migracionit.

Pas një dekade vuajtjesh, ekonomia greke parashikohet të rritet me gati 3% këtë vit, duke tejkaluar shumë mesataren e zonës euro prej 0.8%. Por, një eksod i punëtorëve gjatë krizës ekonomike, një tkurrje e popullsisë dhe rregulla strikte të migracionit e kanë detyruar vendin të gjejë dhjetëra mijëra punëtorë për të mbushur vendet e lira në bujqësi, turizëm, ndërtim dhe sektorë të tjerë.

Greqia do të marrë rreth 5000 punëtorë sezonalë në bujqësi, sipas marrëveshjes së vitit 2022 të nënshkruar me Egjiptin. Vendet kanë diskutuar zgjerimin e skemës “përfituese reciproke” në sektorët grekë të ndërtimit dhe turizmit, tha në një deklaratë Ministria Greke e Migracionit.

Migrimi ka qenë prej kohësh një problem i mprehtë në Evropë, por plani kishte fituar mbështetje të gjerë nga grupet e punëdhënësve të etur për të gjetur punëtorë. Ministri grek i Migracionit u takua me ministrin egjiptian të Punës në Kajro javën e kaluar dhe tha se vendet duhet gjithashtu të rrisin bashkëpunimin për të shmangur flukset e paligjshme të migracionit në rajon.

Zyrtarët egjiptianë kanë thënë se vendi i tyre meriton njohje për ndalimin e migrantëve që nisen nga bregu verior i tij përmes Mesdheut për në Evropë që nga viti 2016.

Bashkimi Evropian këtë vit njoftoi një paketë financimi prej disa miliardë euro dhe një marrëdhënie të përmirësuar me Egjiptin, pjesë e një përpjekjeje për të ulur numrin e emigrantëve që kalojnë nga Afrika e Veriut.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.