Jo vetëm pensionistët! Kush përfiton llogari bankare pa kosto? – Nga përfituesit e asistencës sociale, deri tek invalidët dhe ndihmësit e tyre

“Ligji për llogaritë bankare me shërbime bazike ka nisur të zbatohet që nga muaji Prill. Me këtë ligj ku ofrohen llogari bankare me zero kosto, nuk përfitojnë vetëm pensionistët, por të gjitha kategoritë që trajtohen nga skemat ekonomike dhe sociale në vend.”

Referuar ligjit, bankat do të ofrojnë të gjitha shërbimet me tarifë zero,  pavarësisht nga numri i veprimeve të kryera në llogarinë e pagesave me shërbime bazike, për kategoritë e konsumatorëve që i përkasin këtyre grupeve. Konkretisht ligji ua jep këtë mundësi përfituesve të pagesës së papunësisë; Familjeve dhe individëve, të cilët trajtohen me ndihmë ekonomike; përfituesve të pagesës së aftësisë së kufizuar dhe ndihmësit personalë të tyre; individëve përfitues të statusit të invalidit dhe ndihmësit personal të tyre; të statusit të të verbrit dhe ndihmësit personal të tyre; invalidëve të punës; jetimëve që kanë përfituar statusin, përfituesve e masës së financimit për fëmijën e vendosur në familje kujdestare me vendim gjykate; përfituesve të pensionit social, përfituesve të pensionit të pleqërisë; përfituesve të invaliditetit; përfituesve të pensionit familjar, si dhe përfituesve të ndihmës ekonomike për arsimin e lartë.

Më tarifë zero do të jenë shërbimet si hapja dhe mbyllja e llogarive bankare, tërheqjet në ATM, debitimet direkte; transaksionet e pagesave përmes një karte, përfshirë pagesat on-line; transfertat e kreditit, përfshirë pagesat periodike, aty ku është e zbatueshme, në terminale dhe në sportelet e bankës dhe nëpërmjet platformave on-line. Ligji në fjalë parashikon edhe opsioni i transferimit të llogarisë, nga llogari normale në llogari bankare bazike.

Bankat kamë detyrim hapjen e kësaj llogarie për cilindo individ përfitues dhe aplikues, dhe në rast refuzimi, qytetarët kanë të drejtë të ankohen pranë Bankës së Shqipërisë.

Ligji për llogarinë e pagesave synon përfshirjen financiare të popullsisë dhe modernizimin e sistemit të pagesave. Hapja e kësaj llogarie nuk është detyrim, por një e drejtë.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.