Zbulohet evazioni fiskal 1,7 miliardë euro në Itali – Sekuestrohen kredi tatimore të paligjshme, 311 persona në hetim

Policia Financiare italiane ka zbuluar një mashtrim që ka të bëjë me marrjen e miliarda eurove kredi tatimore të paligjshme nga stimujt e qeverisë, të cilët synonin të inkurajonin rinovimin e shtëpive.

Policia Financiare (GdF) në qytetin veriperëndimor të Savonës tha se kishte vënë nën hetim 311 persona. Aktualisht policia ka sekuestruar kredi tatimore me vlerë një miliardë euro pas kontrollit të 85 kompanive në 10 rajone italiane. Në deklaratat e tyre, oficerë të policisë janë shprehur se ky është operacioni më i madh i këtij lloji, i bërë në Itali deri më sot.

Viteve të fundit, Italia ka prezantuar një sërë skemash që synojnë nxitjen e ekonomisë, duke përfshirë Superbonusin, i cili u mundësoi pronarëve të shtëpive të zbresin 110% të kostos së punës së kursimit të energjisë nga taksat e tyre, ose të përdorin kredinë masive tatimore si një formë pagese. Kjo e fundit, ndodh në rastet kur kemi të bëjmë me ndërtues apo banka.

Sipas hetuesve, nismat abuzohen lehtësisht dhe qeveria e kryeministres Meloni muajin e kaluar arriti të zbulonte 16 miliardë euro mashtrime të lidhura me skemat e ndryshme të bonusit. Ligjvënësit italianë miratuan masat për të frenuar stimujt e kushtueshëm, të cilët përveç tërheqjes së kriminelëve kanë rezultuar gjithashtu shumë më popullor se sa pritej me pronarët legjitimë të shtëpive.

Policia tha se kishte gjetur miliarda euro kredi tatimore që ishin krejtësisht inekzistente, pasi ato ishin marrë nëpërmjet përdorimit të faturave false për punë që nuk ishin kryer kurrë. Hetimet, sipas policisë, zbuluan më pas se si mashtrimi i dyshuar në provincën e Savonës ishte përsëritur në mbarë vendin nga firma të tjera, disa prej të cilave rezultuan të ishin kompani boshe.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.