Skemat lehtësuese për dritat, 2150 aplikime pranë OSHEE – Administratori i FSHU, Luzi: Gjysma prej tyre abonentë familjarë. Borxhi është reduktuar me 3%

Më shumë se 2 mijë aplikime ka pasur nga qytetarët dhe bizneset për të përfituar nga skemat lehtësuese, sa i takon shlyerjes së borxhit të krijuar nga mospagesa e faturave të energjisë elektrike. Thuajse gjysma prej tyre janë abonentë familjarë, të cilët kanë zgjedhur që të paguajnë detyrimet e mbartuara me një këst të vetëm, duke përfituar nga reduktimi i kamatëvonesave në masën 70 për qind. Detajet u përcollën nga Administratori i Furnizuesit të Shërbimit Universal Algert Luzi.

Nga studio e emisionit “Box to Box” Luzi bëri me dije se borxhi ndaj OSHEE është reduktuar me rreth 3 për qind, ose rreth 2 miliardë lekë. Për këtë, tha ai kanë ndikuar jo vetëm ofrimi i skemave lehtësuese për shlyerjen e debive, por edhe puna insistuese e drejtorisë, thirrjet për respektimin të afateve të pagesës së faturës, për të evituar penalitetet, si edhe ndërgjegjësimi i vetë abonentëve.

Përmes skemave lehtësuese, që kanë nisur të aplikohen prej muajit prill të këtij viti qytetarët, institucionet dhe bizneset mund të shlyejnë detyrimet e prapambetura të energjisë elektrike me një pagesë të vetme, duke përfituar reduktim të kamatëvonesave deri në 100 për qind (rasti i binzesit të vogël). Sa i takon pagesës me këste, për abonentët familjar, pavarësisht sa është vlera e tyre e detyrimit, kësti mujor është 2800 lekë.

Ndërsa për kategori të caktuara, siç janë pensionistët apo familjet që trajtohen me ndihmë ekonomike, pagesa mujore apo kësti mujor është 1200 lekë. Veç kësaj, prej muajit maj ka nisur të aplikohet sistemi i ri i faturimit të energjisë elektrike për furrat e bukës. Administratori i FSHU-së, tha se ky sistem i diferencuar faturimi, pra bazuar mbi tipologjinë e subjekteve ka gjetur mbështetjen e shoqatave.

Konkretisht 7.6 lekë/kwh paguajnë subjektet që operojnë si furra buke, 9.5 lekë/kwh subjektet që operojne si furra buke, por tregtojnë dhe produkte pastiçerie dhe 12 lekë/kwh subjektet që funksionojnë si furra buke, pastiçeri dhe bar/kafe. Gjithsej janë rreth 2500 subjekte që preken, ndërkohë verifikimet deri më tani janë përmbyllur në rreth 1300 prej tyre.

Ada Hazizolli /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.