“Minierat e reja”, lejet që do jepen sivjet. Plani 2024/ Leje shfrytëzimi për 20 zona minerare, 4 janë kërkim – zbulim

Zhvillimi i aktivitetit minerar gjatë këtij viti do të fokusohet në nxjerrjen e gurit gëlqeror, gurit dekorativ dhe ranor silicor. Ministria e Infrastrukturës dhe Energjisë ka miratuar dokumentin që orienton zhvillimin e sektorit për këtë vit, në bazë të të cilit parashikohet hapja e procedurave konkurruese apo zhvillimi i proceduarve të hapura për 20 zona minerare.

Sipas planit, 16 zona do të jepet për shfrytëzimin e mineraleve, ndërsa 4 zona të tjera janë për kërkim – zbulim.  Kështu, referuar dokumentit zyrtar këtë vit synohet të jepen 2 leje për kërkim – zbulimin e mineralit të bakrit, me vendndodhje në Vaun e Dejës dhe Tropojë, dhe 2 leje të tjera për mineralin e kromit me vendndodhje në Pukë dhe Kukës.

Këto leje do të jepen përmes procedurave konkurruese dhe atyre të hapura. Forma e marrjes së lejes minerare ka rëndësi të veçantë në drejtim të tansferimit të saj. Kjo pasi, sipas ndryshimeve ligjore të pak viteve më parë, lejet minerare që janë dhënë me procedura konkurruese do të mund të transferohen pas një periudhe 5-vjeçare nga data e dhënies së lejes, ndërkohë që për lejet e tjera, nuk nevojitet kalimi i një periudhe të caktuar. Gjithsesi, sipas planit të miratuar vetëm 2 leje për kërkim – zbulim do të jenë procedura të hapura, ndërsa pjesa tjetër janë procedura konkurruese.

Ola Mitre/SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.