KESH, 1.88 mln euro për blerje energjie – Realizohet procedura e parë për sivjet. Deri më tani ka patur vetëm shitje e optimizim

Mungesa e reshjeve dhe rritja e kërkesës për energji për shkak të rritjes së temperaturave kanë detyruar Korporatën Elektroenergjetike Shqiptare të blejë energji, për plotësimin e nevojave konsumatore. Përmes një tenderi të zhvilluar së fundmi ky dikaster ka shpenzuar rreth 1.88 mln euro, për blerjen e 22,700 mWh energji.

Kjo është procedura e parë e blerjes së energjisë për këtë vit, pasi deri më tani nevojat janë plotësuar nga prodhimi i hidrocentraleve të Kaskadës së Drinit. Po ashtu, gjatë këtij viti situata hidrike ka favorizuar aktivitetin tregtar të Korporatës Elektroenergjetike Shqiptare, që ka zhvilluar 2 tenderë për shitje energjie si dhe një sërë procedurash optimizimi.

Në total, nga aktiviteti tregtar KESH ka gjeneruar gjatë këtij viti rreth 6.2 mln euro të ardhura. Pjesa më e madhe e tyre është gjeneruar nga procedurat e shitjes së energjisë, ku të ardhurat kapin vlerën e rreth 4.8 mln euro.

Ndërsa, pjesa tjetër prej rreth 1.4 mln euro janë siguruar nga procedurat e optimizimit, që përfshijnë shitje dhe blerje të energjisë elektrike. Realizimi i procedurave të shit – blerjes së energjisë synon përfitimin nga diferenca e çmimit të shitjes me atë të blerjes.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.