Norvegjia “miraton” minierat në det – Ofrohen për eksplorim zona të mëdha në shtratin e Arktikut

Norvegjia mund të bëhet vendi i parë në botë që nis aktivitetin e minierave komerciale nënujore me shpresën e nxjerrjes së mineraleve të nevojshme për panelet diellore, turbinat e erës dhe bateritë për automjetet elektrike.

Ministria e Energjisë sqaroi me anë të një deklarate për mediat se bota ka nevojë për minerale për tranzicionin e gjelbër dhe qeveria dëshiron të hetojë nëse është e mundur të nxirren në mënyrë të qëndrueshme minerale nga shtrati i detit në shelfin kontinental norvegjez.

Vlerësimet zyrtare paraprake tregojnë akumulime të konsiderueshme të metaleve dhe mineraleve, nga bakri e deri te mineralet e rrallë.

Në janar, parlamenti i Norvegjisë votoi për hapjen e rreth 280.000 kilometrave katrorë të shtratit të detit për eksplorimin e mineraleve. Qeveria ofroi zona që mbulojnë rreth 38% për qind të sipërfaqes së miratuar dhe i zgjodhi në bazë të interesit për sektorin minerar. Ambientalistët synojnë të kundërshtojnë planet e qeverisë në gjykatë.

Zona e ofruar për kërkime është shumë e madhe duke pasur parasysh paralajmërimet e shkencëtarëve për ndikimin e mundshëm në ekosistemet e ndjeshme, theksoi Greenpeace.

Hulumtimi i planifikuar kundërshtohet gjithashtu nga vende të tilla si Franca dhe Parlamenti Europian, duke bërë thirrje për një moratorium global për studimin më të mirë të ndikimit në organizmat në thellësi të detit.

Qeveria norvegjeze pretendon se faza fillestare e eksplorimit do të ketë ndikim minimal mbi organizmat dhe se kompanitë do të duhet të marrin një leje të veçantë minerare.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.