Sa të punësuar kemi në institucionet publike? – 36.3% e punonjësve janë në varësi të Ministrisë së Arsimit dhe Sportit
Ligji për buxhetin e shtetit 2024, planifikon 85,346 punonjës buxhetorë ose 428 punonjës më shumë se në vitin 2023. Ministritë janë institucionet buxhetore më të mëdha në vend. Por si paraqitet trendi i të punësuarve në tre vitet e fundit në institucionet buxhetore të vendit? Sipas shifrave, konstatojmë se rreth 37% e punonjësve buxhetorë në vitin 2023 janë nën vartësinë e Ministrisë së Arsimit dhe Sportit, në vlerë absolute themi se gjatë këtij viti janë punësuar 31,005 punonjës në këtë institucion.
Kjo ministri ka patur numrin më të lartë të punonjësve edhe në vitin 2022 dhe vijon ta ketë edhe gjatë vitit 2024. Pas ministrisë së Arsimit dhe Sportit, ndjek Ministria e Brendshme me 15,248 punonjës që përbëjnë 18% të totalit. Pason Ministria e Mbrojtjes me 8,863 punonjës ose me 10.4% të totalit të punonjësve buxhetorë. Vazhdojnë në renditje, Ministria e Financave dhe Ekonomisë me 6,040 punonjës, Ministria e Drejtësisë me 5,378 punonjës dhe Ministria e Shëndetësisë dhe Mbrojtjes Sociale me 4,338 punonjës.
“Scan Intel” ka përpunuar të dhënat e publikuara nga Ministria e Financave për punonjësit buxhetorë për vitin 2024. Shifrat tregojnë se Ministria e Arsimit dhe Sportit vazhdon të mbajë vendin e parë me numrin më të lartë të punonjësve dhe ndiqet nga Ministria e Brendshme me 15,296 punonjës, Ministria e Mbrojtjes me 8,863 punonjës dhe Ministria e Drejtësisë me 5,346 Pra, tendeca e punësimit ka pak diferencë krahasimisht me vitin 2023.
Ndërkohë, nëse bëjmë një analizë vjetore vëmë re se Ministria e Financave dhe Ekonomisë ka patur një ulje drastike me 46.4%, duke punësuar gjatë vitit 2024, 2,802 punonjës më pak se një vit më parë. Në të kundërt, Ministria e Kulturës ka shënuar rritje me 299.4% duke punësuar 3,000 punonjës më shumë se një vit më parë. Në fund të analizës konkludojmë se: Trendi sa i takon numrit të punonjësve buxhetorë eshtë rritës vit pas viti.
Armela Duka/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.