Policia shton kontrollet gjatë sezonit veror – Stacione të reja policie në zonat me fluks turistësh të huaj

Së shpejti pritet të ngrihet një strukturë e posaçme pranë Policisë së Shtetit, e cila do të caktojë disa punonjës për kryerjen e patrullimeve të rregullta nëpër qytete sidomos gjatë sezonit turistik, me qëllim garantimin e sigurisë publike. Ministria e Brendshme ka publikuar për konsultim publik një projektvendim mbi miratimin e planit të veprimit 2024-2026 në zbatim të strategjisë më të fundit për sigurinë në komunitet. Ky projektakt parashikon rritjen e parametrave të sigurisë në komunitet dhe reformimin e shërbimit policor.

Por çfarë masash do të ndërmerren për garantimin e sigurisë publike gjatë sezonit turistik?

Në zonat me fluks të shtuar turistësh do të ngrihen stacione ose shërbime shtesë të Policisë së Shtetit. Inspektimi i subjekteve ushqimore në zonat tursitike do të vijojë, me qëllim garantimin e sigurisë ushqimore dhe të kushteve të duhura të tregtimit. Gjithashtu, në fokus do të jetë edhe qetësia publike në zonat urbane, si dhe në zonat turistike lidhur me nivelin kufi të zhurmave në mjedise të caktuara.

Ndërkohë, një Njësi Policore Detare do të ngrihet për mbikëqyrjen dhe zbatimin e akteve ligjore e nënligjore për lundrimin e mjeteve ujore argëtuese apo sportive dhe parandalimin e ngjarjeve që mund të shkaktohen gjatë lundrimit të tyre.

Përmes masave të parashikuara në këtë projektvendim synohet ulja e kriminalitetetit ose e sjelljeve anti shoqërore në komunitet, ulja e veprave penale, si dhe rritja e parametrave të sigurisë nëpërmjet kontrollit të territorit. Plani i Veprimit do të përmirësojë strukturat në shërbim të komunitetit, do të konsolidojë Këshillat Vendorë të Sigurisë Publike dhe forcojë rolin e bashkive në garantimin e sigurisë publike.

Kostoja e përgjithshme e përllogaritur për zbatimin e Planit të Veprimit 2024 – 2026 është rreth 14,57 miliardë lekë, ose rreth 133,7 milionë euro.

Ledina Elezi/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.