Ndërprerja e plotë energjisë, Drenova: Ja e vërteta – Drejtori i OST flet për shkaqet e ‘blackout-it’ që ndodhi më 21 qershor 2024 

Më 21 qershor 2024 në katër vende të Ballkanit, përkatësisht Shqipëri, Mali i Zi, Bosnjë Hercegovinë e pjesërisht në Kroaci, pati një ndërprerje të plotë të furnizimit me energji elektrike. Se çfarë ka ndodhur atë ditë e shpjegoi në një intervistë për portalin Albanian Post administratori i Operatorit të Sistemit të Transmetimit, Skerdi Drenova. Sipas tij pavarësisht dyshimeve dhe keqinformimeve “Shqipëria nuk ishte burimi i ngjarjes dhe ca me keq fajtore”.

Drenova shpjegon se bazuar në informacionin e dërguar nga Operatorët e Transmetimit më 21 qershor nuk pritej asnjë anomali. Por nga hetimet paraprake ka rezultuar se problematika ka nisur në Malin e Zi në orën 12:09, pas një defekti në linjën 400kv Podgoricë-Ribarevinë. Drenova teknikisht e shpjegon në këtë mënyrë situatën ‘Burimi i incidentit është i vështirë të përcaktohet në këtë moment, pasi ende janë duke u mbledhur informacione nga Operatorët e Transmetimit, të Shpërndarjes, gjeneruesit në të 4 vendet e Ballkanit.

Deri më tani është evidentuar se ka pasur një linjë 400kV Tuzla-Visegrad, jashtë pune në sistemin e Bosnjës, e cila ka qenë e padeklaruar dhe mungonte si informacion në analizën e sistemit. Për momentin njihet deri diku, sekuenca paraprake e ngjarjes, e cila e vijon me një difekt në linjën 400kV Podgoricë-Ribarevinë në Mal të Zi, ora 12:09, e cila ka shkaktuar një rishpërndarje të flukseve të fuqisë dhe një rritje të fluksit në linjën Greqi-Shqipëri, më pas ndodh një defekt kalimtar në linjën Shqipëri-Greqi në orën 12:21’.

Duke argumentuar se defekti nuk ndodhi në Shqipëri, kreu i OST flet edhe për kohën e shpejti të riparimit në Shqipëri, ndërkohë që me operatorët e tjerë nuk ka ndodhur e njëjta gjë. “Linja 400kV Shqipëri-Greqi (Zemblak-Kardia) është rikthyer në punë për një kohë të shkurtër rreth 15min, pra defekti ka qenë kalimtar, ndërkohë në Mal të Zi, defekti është riparuar pas një kohe të gjatë, gjatë disa orëve. Ndërsa në Bosnjë ka zgjatur akoma më shume rikthimi i sistemit në punë. Në Shqipëri furnizimi i plotë për të gjithë konsumatorët është rikthyer për 30min”.

Ndërkohë në aspektin Teknik Drenova shton edhe një shkak tjetër që janë temperaturat e larta. Sipas tij “Temperaturat e larta kanë luajtur një rol në stakimet kalimtare, por janë marrë masat duke eliminuar faktorë që mund të sjellin stakime, të cilat mund të cenojnë edhe sigurinë e sistemit elektrik’.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.