Tregu i sigurimeve, regjistrohen 6.000 kontrata të reja – Hysa: Të varur nga sigurimi motorik. Vlerat janë rritur, por ndikoi euro

Alida Lula / SCAN

 

6000 kontrata të reja janë shënuar në tregun e sigurimeve, ku eksperti Erald Hysa thotë për SCAN tv se në vlerë janë rritur për 5-vjeçarin 2019-2024. Kontratat kanë shënuar rritje me 9.62% krahasuar me të njëjtën periudhë të një viti më parë, por sipas tij, duke qënë se një pjesë e kontratave të mëdha kanë qënë në euro, janë ndikuar nga zhvlerësimi i monedhës europiane.

“Ka një rritje të të ardhurave, janë 6000 kontrata në 5 vitet e fundit. Në vlerë janë rritur, një rritje e mirë, ka patur dhe efekt kursi i euros, sepse një pjesë e kontratave të mëdha janë në euro dhe kjo ka sjellë vështirësi në analiza. Duhet të merret parasysh  dhe kursi i këmbimit. Por ka një trend rritjeje, ajo që s’ka rritje është dëmshpërblimi mesatar” – thotë Hysa.

Tregu mbetet i orientuar tek sigurimet e Jo-Jetës, të cilat sollën 91.31% të vëllimit të përgjithshëm të primeve, ndërsa sigurimet e Jetës kanë 8.64% dhe risigurimi me 0.048%. Eksperti i tregut të sigurimeve Erald Hysa, tregon dhe arsyet se pse në Shqipëri mbizotëron tregu i sigurimit motorik, i cili mban dhe peshën kryesore.

“Shqiptarët përballen më shumë me sigurimin motorik dhe duke u përballur me këtë, e ndjejnë si detyrim. Diçka që është e detyrueshme e bëjnë, atë që nuk është jo dhe tkurren. Kompanitë, duke ditur projeksionin e rritjes së numrit të makinave, dinë dhe se sa të ardhura do të kenë gjatë vitit. Dhe kështu bëhet një llogaritje e dëmeve. Dëmet kanë qënë standarde në këto vite, kështu që mungon shtytja për produkte të reja, për të nxjerrë ide të reja, ose për të marë nga tregu lokal”- shton Hysa

Ekpserti thekson edhe se sigurimi KASKO po njeh ecuri pozitive për shkak dhe të numrit të vjedhjeve të automjeteve, ndërsa thotë se një kategori makine po grabitet rëndom në Europë. Ndërkohë, numri i kontratave të sigurimit vullnetar u rrit me 2.74 %. Në portofolat e Pronës, Përgjegjësive, Garancive të cilat gjatë muajit janar – qershor 2024 siguruan mbi 2,353 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 74%, të pasuara nga sigurimi i Përgjegjësisë së Përgjithshme me mbi 18% të totalit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.