Presidenti dekreton ndryshimet në qeveri – Pasdite mbahet seanca plenare për votimin e ministrave të rinj

 

Presidenti i Republikës Bajram Begaj, ka dekretuar ndryshimet në qeveri, sipas propozimeve të bëra nga kryeministri.

Presidenti ka dekretuar shkarkimin e Ministrit të Brendshëm, Taulant Balla dhe emërimin e tij si ministër I Shtetit për Marrëdhëniet me Parlamentin. Si ministër të Brendshëm, Begaj ka emëruar Ervin Hoxhën.

Po ashtu, presidenti ka dekretuar shkarkimin e Ministrit të Mbrojtjes,  Niko Peleshi dhe emërimin në këtë detyrë të Pirro Vengut.

Dekrete të tjera janë ata për shkarkimin e Ministrit të Financave, Ervin Mete dhe  emërimin në këtë detyrë të Petrit Malajt.

Ndërkohë, presidenti ka dekretuar shkarkimin e ministrit të Shtetit për Marrëdhëniet me Parlamentin, Elisa Spiropali e cila merr detyrën e Kryetares së Kuvendit.

Ndërkohë, ministrat e rinj pritet të votohen në seancë plenare pasditen e sotme, për të bërë më pas betimin në Presidencë e për të vijuar zyrtarisht detyrën e tyre.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.