5-fishohen gjobat për bizneset që tregtojnë cigare – Ligji i ri/ Ndalohet shitja e cigareve elektronike për persona nën moshën 18-vjeç

Elisabeta Dosku/ SCAN

 

Qeveria ka marrë masa të ashpra për të mbrojtur të miturit nga konsumi dhe varësia e produkteve të duhanit. Ligji i ri i botuar në Fletoren Zyrtare, i cili hyn në fuqi në fillim të muajit Shtator, përcakton se ndalohet shitja ose furnizimi për qëllime tregtimi i produkteve të duhanit, i cigareve, cigareve  elektronike, shishave/nargjileve personave nën moshën 18 vjeç.

Po ashtu ndalohet ofrimi falas ose shitja me ofertë e këtyre produkteve për çdo person nën moshën 18 vjeç. Sipas ligjit të gjitha pikat e shitjes duhet të pajisen me tabelë të dukshme dhe të lexueshme, ku të shkruhet: “Ndalohet shitja e produkteve të duhanit, cigareve elektronike, shishave/nargjileve personave nën 18 vjeç”.

Nëse subjektet e shitjes me pakicë apo me shumicë nuk zbatojnë këtë detyrim, atëherë sipas ligjit, do të gjobiten deri në 200 mijë lekë dhe do t’u konfiskohen produktet e duhanit, cigareve, cigareve elektronike. Masa administrative në këtë rast është dyfishuar në raport me ligjin ekzistues. Ndërsa nëse këto produkte i tregtohen personave nën 15 vjeç, masa e gjobës është 400 mijë lekë.

Nga ana tjetër, ligji përcakton se ndalohet shitja e produkteve të duhanit, cigareve elektronike, shishave/nargjileve në institucionet shëndetësore; në institucionet arsimore; në institucionet sportive; në makinat shitëse automatike; me anë të vetëshërbimit; në rrugë nga shitësit ambulantë; nëpërmjet shërbimit postar.

Në këtë rast subjektet do të gjobiten me një gjobë 5-fish më të lartë, në masën 500.000 kur kjo shkelje përsëritet.

Ligji synon gjithashtu të ndalojë reklamimin direkt dhe indirekt të produkteve të duhanit,  në çfarëdolloj forme që të jetë ai, si dhe përmes kanaleve mediatike apo rrjeteve sociale ku dhe në këtë rast masat administrative janë shumë të larta.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.