Si kanë ecur investimet publike në 5 vite? – Në 7 muaj u disbursuan nga buxheti 336 milionë euro
Elisabeta Dosku/ SCAN
Afro 33.6 miliardë lekë kanë shkuar për investime publike në 7 muajt e parë të vitit. Referuar të dhënave zyrtare të Ministrisë së Financave, shpenzimet kapitale kanë një mosrealizimin në raport me planin e periudhës në nivelin -26.1 për qind. Ndërsa në raport me janar-korrik 2023, janë 3.4 miliardë lekë më pak të disbursuara.
Nëse do të bëjmë një krahasim të buxhetit të shpenzuar për investime në 7-mujor, në 5 vitet e fundit vihet re një luhatje e vazhdueshme.
Në 2020 shpenzimet kapitale për këtë periudhë regjistrohen në 35.9 miliardë lekë, duke pësuar një rritje në tre vitet në vijim, ku 2021-shi shënon vlerën më të lartë në 39.9 miliardë lekë.
Shkak për disbursimin në ulje të fondeve janë shpesh procedurat e prokurimit që ndjekin institucionet të cilat marrin një kohë të konsiderueshme, si dhe terrenet e vështira ku po realizohen projektet.
Megjithatë për muajin korrik 2024 janë disbursuar 7 miliardë lekë, me një rritje prej 0.9 miliardë lekë në raport me korrikun 2023.
Me aktin e fundit normativ të miratuar në muajin Gusht, qeveria rriti financimin për shpenzimeve kapitale në 150 miliardë lekë, nga 135 miliardë lekë që ishte në aktin normativ të muajit Shkurt, me një kapërcim prej 11%.
Tashmë është bërë praktikë që qeveria rishikon sërish buxhetin në mbyllje të vitit për të bërë rialokime të nevojshme, duke marrë fonde nga projekte që kanë pasur ecuri të dobët, për ti çuar ato në projekte me perfomancë më të mirë, në mënyrë që të përfundojnë sa më shpejt.
Shumica e buxhetit të shpenzimeve kapitale për vitin 2024 shkon për financimin e projekteve në vazhdim si: Unaza e madhe e Tiranës, Ndërtimi i Tunelit të Llogarasë, Rruga e Arbrit, Segmenti Orikum-Dukat, apo projektet e nisura në infrastrukturën e ujësjellës-kanalizimeve dhe projektet e zhvillimit urban të implementuara nga Fondi Shqiptar i Zhvillimit. Si dhe vijon financimi për projektin e rindërtimit, zë në të cilën u shtuan sërish fonde me aktin e fundit normativ.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.