Protesta në Francë kundër tarifave ndaj Kinës – Prodhuesit e konjakut, të shqetësuar nga pasojat e vendimit në industri

Kristi Ceta/SCAN

 

Rreth 800 protestues me traktorë u mblodhën në qytetin jugperëndimor francez Konjak (Cognac) këtë javë duke kërkuar një shtyrje të votimit të ardhshëm të Bashkimit Evropian për vendosjen e taksave për automjetet elektrike kineze.

Nga frika e hakmarrjes së Kinës nëse mosmarrëveshjet përshkallëzohen, kreu i sindikatës për prodhuesit e konjakut ka paralajmëruar se një vendim për të vendosur tarifa për automjetet elektrike kineze do të rrezikojë të gjithë industrinë.

Komisioni Evropian, krahu ekzekutiv i bllokut, vendosi në fillim të korrikut se tarifat e përkohshme deri në 37.6 për qind do të vendosen për automjetet elektrike të prodhimit kinez.

Më 20 gusht, komisioni publikoi një projekt-plan për t’i bërë ato tarifa përfundimtare, me pak rishikime, pasi të vijë miratimi nga vendet anëtare të Bashkimit Evropian.

Sipas të dhënave, normat e taksave kundër subvencioneve për tre kompanitë kineze të automjeteve elektrike, BYD, Geely dhe SAIC, janë përkatësisht 17.0 përqind, 19.3 përqind dhe 36.3 përqind. Bashkimi Evropian planifikon të mbajë një votim për të futur këto tarifa përfundimtare më 25 shtator.

Në fillim të këtij muaji, BE-ja mori oferta nga prodhuesit e makinave elektrike në Kinë për çmimet minimale të importit në bllok si një mënyrë për të shmangur tarifat, por i hodhi poshtë të gjitha propozimet.

Ministria e Tregtisë e Kinës ka paralajmëruar kundërmasa në përgjigje të kësaj lëvizje të njëanshme të BE-së, për të mbrojtur të drejtat dhe interesat legjitime të ndërmarrjeve kineze.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.