“Ekonomia gjermane ka nevojë për reforma” – Kreu i Bundesbank thekson se rimëkëmbja do të vijë pas uljes së inflacionit

Kristi Ceta/SCAN

 

Ekonomia gjermane do të rimëkëmbet pasi inflacioni i lartë dhe normat e interesit të zbehen, por vendi ka ende nevojë për reforma të mëdha duke filluar nga emigrimi te kujdesi për fëmijët, tha presidenti i Bundesbank, Joachim Nagel.

Ekonomia më e madhe e Evropës po kalon një vit të dytë radhazi të tkurrjes ekonomike, ndërsa kërkesa për eksportet e saj ulet dhe aktiviteti i brendshëm zvogëlohet nga kostot e larta të huamarrjes.

Por Nagel kritikoi mediat për negativitetin e tyre ndaj ish-fuqisë ekonomike të Evropës dhe i qëndroi qëndrimit të Bundesbank-ut se ekonomia do të rimëkëmbet sapo të zbehen disa nga faktorët që e pengojnë atë, duke përfshirë kërkesën e ulët nga vendet e tjera evropiane.

“Ajo që është e sigurt është se disa nga këta faktorë kanë vetëm një efekt të përkohshëm,” shtoi ai. “Prandaj ne supozojmë se ekonomia gjermane ngadalë do të marrë një vrull përsëri.”

Megjithatë, Nagel, i cili përfaqëson Gjermaninë në Këshillin Drejtues të Bankës Qendrore Evropiane, pranoi se vendi i tij u përball me një sërë sfidash strukturore, duke përfshirë kostot e larta të karburantit, shumë burokraci dhe mungesën e punëtorëve të kualifikuar.

Ai bëri thirrje për reforma të thella si vendosja e një çmimi për emetimet e karbonit, centralizimi i administratës financiare, tërheqja selektive e punëtorëve nga jashtë dhe ofrimi i kujdesit më të mirë për fëmijët, në mënyrë që më shumë gra të mund të bashkohen në tregun e punës.

“Qeveria Federale po vëzhgon tre fushat e politikës ekonomike që sapo kam diskutuar. Megjithatë, ka ende shumë punë për të bërë,” shtoi Nagel, duke vlerësuar Iniciativën e Rritjes.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.