Ndërhyrje në rrugë për mirëmbajtjen – ARRSH, tenderë 791 mln lekë për 2 rajone të vendit 

Ola Mitre / SCAN

 

Autoriteti Rrugor Shqiptar do të rishpallë tenderët për punime dhe mirëmbajtje rrugësh për 2 rajone të vendit.

Procedurat e prokurimit u hapën fillimisht në muajin qershor për 4 rajonet, por pas zhvillimit për Rajonin Qendër Lindje Korçë dhe Qendër Perëndim Tiranë, tenderët për kontratat e mirëmbajtjes do të rishpallen, çka sugjeron mosfinalizimin me sukses të tyre gjatë fazës së parë.

Sipas planifikimit të ARRSH-së, fondi limit për rajonin Qendër Lindje Korçë do të jetë 541.2 mln lekë, ndërkohë që për rajonin Qendër Perëndim Tiranë, 250 mln lekë.

Mirëmbjatja e rrugëve nacionale të vendit ndahet në 4 rajone, teksa zhvillimi i procedurave përkon me përfundimin e kontratave për shërbimin e mirëmbajtjes me performancë të rrugëve, të lidhura në vitin 2020. Mirëmbajtja rutinë konsiston në detyra, siç janë riparimet e gropave, pastrimi i drenazhimeve, vulosja e plasaritjeve, prerja e vegjetacionit, etj.

Ndërkohë që, mirëmbajtja periodike konsiston në masa më të kushtueshme, në mënyrë që të parandalohet degradimi i rrugëve, siç është nivelimi, drenazhimet, rimbushjet, mbishtresat me asfalto – beton, etj.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.