Italia synon rritje taksash për kompanitë më fitimprurëse – Njoftimi i Ministrit të Ekonomisë ndikon negativisht në bursën e Milanos

Kristi Ceta/SCAN

 

Italia planifikon të rrisë tatimin për kompanitë që operojnë në sektorë që përfitojnë nga kushte të favorshme biznesi, tha Ministri i Ekonomisë Giancarlo Giorgetti, duke goditur aksionet në bursën e Milanos.

Giorgetti nuk dha detaje, por përmendi prodhuesit e armëve si shembull të një sektori që po kalon një periudhë pozitive biznesi. “Do të ketë një thirrje të përgjithshme për të gjithë që të kontribuojnë, jo vetëm bankat,” shtoi ai.

Disa tregtarë thanë se vërejtjet e tij rënduan në indeksin e bursës së Milanos (FTSE MIB), që u mbyll me rënie 1.5%, me stoqet e energjisë dhe financiare ndër performuesit më negativë.

Italia po punon për një buxhet të vitit 2025 me masa që vlejnë rreth 25 miliardë euro, kryesisht të dedikuara për uljen e taksave mbi të ardhurat dhe kontributet sociale.

Sipas planit, Roma do të rrisë deficitin buxhetor të vitit të ardhshëm në 3.3% të prodhimit të brendshëm bruto, nga 2.9% sipas tendencave aktuale, duke mbledhur rreth 9 miliardë euro hua shtesë për të financuar paketën.

Pjesa tjetër do të financohet domosdoshmërisht nëpërmjet një kombinimi të të ardhurave më të larta fiskale dhe shkurtimeve të shpenzimeve.

“Ne do të miratojmë një buxhet që do të kërkojë sakrifica nga të gjithë”, theksoi Giorgetti.

Ndër masat që po studiohen, Thesari tha në një deklaratë se planifikonte t’i jepte fund një zbritjeje të akcizës për naftën, duke siguruar që tatimi i përgjithshëm mbi karburantin të mbetet i pandryshuar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.