Tregtia në Detin e Kuq, në rënie historike – Trafiku i anijeve u tkurr me 56%, për shkak të konflikteve në Lindjen e Mesme

Kristi Ceta/SCAN

 

Tregtia në Detin e Kuq, që dikur përbënte 10% të të gjithë tregtisë detare globale, ka parë një rënie historike me rritjen e tensioneve në Lindjen e Mesme të shkaktuara nga sulmet e pandërprera të Izraelit në Gaza, e cila ka mbushur përvjetorin e saj të parë.

Sulmet e Izraelit në Gaza, të nisura më 7 tetor 2023, nxitën hakmarrjen e Organizatës politike të mbështetur nga Irani, Houthi, që nisi të godasë anijet tregtare në Detin e Kuq dhe ngushticën Bab-el-Mandeb. Këto sulme u intensifikuan në dhjetor të vitit të kaluar.

Shumica dërrmuese e anijeve tregtare që përdornin më parë Detin e Kuq dhe ngushticën Bab-el-Mandeb kanë ndryshuar rrugën dhe që atëherë lundrojnë rreth Kepit të Shpresës së Mirë, pika më jugore e Afrikës.

Tranzitet totale të anijeve në Detin e Kuq ranë 56% nga viti në vit në shtator, sipas të dhënave nga gjurmuesi i anijeve dhe analitikës detare MarineTraffic. Trafiku i kontejnerëve mori goditjen më të madhe me një rënie prej 73% gjatë së njëjtës periudhë, ndërsa trafiku i anijeve për gazin natyror të lëngshëm ra me 87%.

Rreth Kepit të Shpresës së Mirë, trafiku i anijeve u rrit me 76% në një vit dhe tranziti i anijeve me kontejnerë u rrit me 420%. Gjatë të njëjtës periudhë, trafiku i anijeve me gaz të lëngshëm u rrit me 400%.

Për shkak të distancave më të gjata të udhëtimit rreth Kepit të Shpresës së Mirë, afërsisht 10 deri në 12 ditë më shumë, tarifat e mallrave filluan të rriteshin me shpejtësi në dhjetor 2023.

Sulmet ndaj anijeve në Detin e Kuq zbuluan rëndësinë kritike të tregtisë detare, e cila përbën 80% të vëllimit global. Ekspertët theksojnë se kanali i Suezit është një arterie jetike e tregtisë, pasi një cisternë nafte që shkon nga porti i Ras Tanura në Arabinë Saudite në Roterdam tani duhet të udhëtojë 74% më tepër se normalja, ndërsa një kontejner i dërguar nga Singapori në të njëjtin port holandez kërkon një udhëtim 42% më të gjatë.

Gjithashtu, mallrat si nafta dhe gruri përshkojnë distanca më të mëdha për shkak të tensioneve në Detin e Kuq pas luftës në Ukrainë dhe reduktimit të kapacitetit në Kanalin e Panamasë, duke çuar në rritje të çmimeve.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.