Kina “hakmerret” ndaj BE – Pekini vendos masa shtrënguese për importet e konjakut nga blloku

Kristi Ceta/SCAN

 

Kina vendosi masa të përkohshme për importet e konjakut nga Bashkimi Evropian, disa ditë pasi blloku votoi tarifat për automjetet elektrike të prodhimit kinez. Ministria e Tregtisë e Kinës tha se gjetjet paraprake të një hetimi kishin përcaktuar se konjaku me çmim të ulët nga Bashkimi Evropian sjell një “dëm të konsiderueshëm” për sektorin vendas.

Franca reagoi duke thënë se masat e përkohshme kineze ishin “të pakuptueshme” dhe shkelnin tregtinë e lirë. Parisi qartësoi se do të punonte me Komisionin Evropian për të sfiduar masën në Organizatën Botërore të Tregtisë.

Në shenjë të rritjes së tensioneve, ministria e Kinës shtoi në një deklaratë tjetër se një hetim i vazhdueshëm për produktet e derrit të BE-së do të arrijë në një vendim “objektiv dhe të drejtë” kur të përfundojë. Pekini tha gjithashtu se po konsideronte një rritje të tarifave për importet e automjeteve me motor të madh, gjë që do të godiste më rëndë prodhuesit gjermanë. Eksportet gjermane të automjeteve me motorë 2.5 litra ose më të mëdhenj në Kinë arritën në 1.2 miliardë dollarë vitin e kaluar.

Objektivi kryesor i Pekinit me hetimin e konjakut ishte Franca, për shkak të mbështetjes së saj ndaj tarifave për automjetet elektrike. Dërgesat e konjakut francez në Kinë arritën në 1.7 miliardë dollarë vitin e kaluar dhe përbënin 99% të importeve të këtij alkooli në vend.

Nga 11 tetori, importuesit e konjakut me origjinë nga BE do të duhet të paguajnë depozitat e sigurisë që variojnë kryesisht nga 34.8% në 39.0% të vlerës së importit. Hennessy dhe Remy Martin ishin ndër markat më të goditura nga masat, me importuesit që duhej të paguanin depozita prej 39.0% dhe 38.1%, respektivisht.

Presidenti francez Emmanuel Macron tha javën e kaluar se hetimi i konjakut ishte “hakmarrje e pastër”, ndërsa tarifat e automjeteve elektrike duheshin për të ruajtur barazinë. Megjithatë, masat mund të kthehen mbrapsht nëse arrihet një marrëveshje përpara se të vendosen tarifat përfundimtare.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.