Shqipëria, një hap më afër Bashkimit Europian – Hapen negociatat/ Nga kriteret ekonomike tek kontrolli financiar, çfarë përmban kapitulli i parë

 

Më 15 Tetor,  Shqipëria do të hapë negociatat me Bashkimin Europian për grup kapitullin e parë, ditë kur do të mbahet edhe konferenca e dytë ndërqeveritare me BE-në , në Luxenburg.

Sipas metodologjisë së re të procesit të zgjerimit të BE-së, kapitujt që kanë të bëjnë me të drejtat themelore dhe sundimin e ligjit duhet të hapen në fillim, pasi në procesin e negociatave duhet të ketë më shumë kohë për t’i përmbushur kriteret edhe për t’i mbyllur kapitujt.

Takimi do të shërbejë për hapjen e negociatave me Shqipërinë për fushat dhe kapitujt themelor, siç janë  Funksionimi i institucioneve demokratike; Reforma e administratës publike; Kapitulli 23 – Gjyqësori dhe të drejtat themelore; Kapitulli 24 – Drejtësia, liria dhe siguria; Kriteret ekonomike; Kapitulli 5 – Prokurimi publik; Kapitulli 18 – Statistikat dhe Kapitulli 32 – Kontrolli financiar.

Pas prezantimit të metodologjisë së rishikuar për negociatat e anëtarësimit në vitin 2020, kapitujt negociues ndahen në gjashtë grupime tematike: Bazat; Tregu i brendshëm; Konkurrueshmëria dhe rritja gjithëpërfshirëse; Axhenda e gjelbër dhe lidhje e qëndrueshme; Burimet, bujqësia dhe kohezioni; dhe marrëdhëniet e jashtme.

Ky është kapitulli i parë nga 33 në përgjithësi që Shqipëria duhet t’i hapë dhe mbyllë për t’u anëtarësuar në BE.

Aplikimi i Shqipërisë për anëtarësim në BE u dorëzua më 24 prill 2009. Në tetor 2012, Komisioni Evropian rekomandoi që Shqipërisë t’i jepet statusi i kandidatit, në varësi të përfundimit të masave kyçe në fushat e reformës gjyqësore dhe të administratës publike dhe rishikimit të rregullores së procedurës parlamentare.

Më 19 korrik 2022 e cila u konsiderua ditë  historike për Shqipërinë, u mbajt konferenca e parë ndërqeveritare me Bashkimin Evropian.  Palët paraqitën kornizën negociuese, duke çelur zyrtarisht negociatat për anëtarësim.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.