India ndihmon Rusinë me eksportet e “ndaluara” – Bëhet furnizuesi i dytë më i madh për teknologjitë e sanksionuara

Kristi Ceta/SCAN 

 

India është bërë furnizuesi i dytë më i madh i teknologjive kritike për Rusinë, pavarësisht sanksioneve ndërkombëtare që synojnë të kufizojnë aftësitë ushtarake të Moskës. Këto teknologji, duke përfshirë mikroçipet, qarqet elektronike dhe makineritë, janë jetike për industrinë ruse të mbrojtjes. Vetëm Kina ia kalon Indisë në këtë rol, sipas Bloomberg.

Eksportet indiane të mallrave të tilla në Rusi tejkaluan 60 milionë dollarë në prill dhe maj 2024, më shumë se dyfishi i dy muajve të mëparshëm. Deri në korrik, shifra ishte rritur në 95 milionë dollarë.

Përafërsisht një e pesta e teknologjive të ndjeshme të përdorura në sektorin ushtarak të Rusisë kalojnë përmes Indisë. Zyrtarët perëndimorë kanë ngritur shqetësime për rolin e Indisë, por përpjekjet për të adresuar këtë çështje me autoritetet indiane kanë dhënë pak përgjigje.

Tregtia e vazhdueshme e Indisë me Rusinë paraqet një sfidë për aleatët e Ukrainës, përfshirë Shtetet e Bashkuara dhe Bashkimin Evropian, të cilët kanë kërkuar të kufizojnë aksesin e Moskës në mallra të lidhura me ushtrinë. Në të njëjtën kohë, këto qeveri janë të prirura të mbajnë lidhje diplomatike dhe ekonomike me kryeministrin indian Narendra Modi, pavarësisht marrëdhënieve të tij miqësore me liderin rus Vladimir Putin.

Shumë prej këtyre mallrave, të klasifikuara si teknologji me përdorim të dyfishtë, janë të ndaluara për t’u eksportuar direkt në Rusi për shkak të sanksioneve. Kështu, Rusia i merr ato nga vende të treta, shpesh përmes filialeve të korporatave perëndimore ose rrjeteve ndërmjetësuese.

Një përfaqësues i Departamentit të Shtetit të SHBA-së konfirmoi se Uashingtoni planifikon të paralajmërojë sërish Indinë dhe kompanitë e saj në lidhje me rreziqet që lidhen me një tregti të tillë. Më parë, Turqia dhe Emiratet e Bashkuara Arabe ishin identifikuar si ndërmjetësit kryesorë për furnizimin e Rusisë me materiale për programet e saj të armëve.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.