Kina, paketë fiskale për të nxitur ekonominë – Pekini do të rrisë emetimin e borxhit për të mbështetur tregun

Kristi Ceta/SCAN

 

Ministria e Financave e Kinës zbuloi një paketë stimuluese fiskale që synon ringjalljen e ekonomisë dhe arritjen e objektivit të rritjes. Ministria tha në një konferencë shtypi se do të rriste “dukshëm” emetimin e borxhit të qeverisë për të ofruar subvencione për familjet me të ardhura të ulëta, për të mbështetur tregun e pronës dhe për të rimbushur kapitalin e bankave shtetërore.

Konferenca e shumëpritur vjen pasi banka qendrore dhe rregullatorët e tjerë në fund të shtatorit njoftuan masat stimuluese monetare më agresive që nga COVID-19, duke përfshirë hapa për të ringjallur tregun e dëmtuar të pronave, si ulja e normave të hipotekave.

Kina planifikon të emetojë obligacione speciale sovrane me vlerë rreth 283.02 miliardë dollarë këtë vit si pjesë e stimulit të ri fiskal. Vendi do të rrisë mbështetjen për qeveritë vendore për të trajtuar rreziqet e fshehura të borxhit, duke rritur kapacitetin e tyre për të mbështetur ekonominë. Qeveria ka ndarë 169.81 miliardë dollarë në kuotat e obligacioneve lokale këtë vit për të ndihmuar në zgjidhjen e borxheve ekzistuese të fshehura dhe shlyerjen e detyrimeve të prapambetura të qeverisë ndaj firmave.

Pekini planifikon një program shkëmbimi borxhi në shkallë të gjerë, së bashku me përdorimin e vazhdueshëm të kuotave të obligacioneve për zgjidhjen e borxhit.

Gjithashtu, qeveria do të zgjerojë përdorimin e të ardhurave nga obligacionet e organeve vendore për të mbështetur tregun e pronave dhe për të rikapitalizuar bankat e mëdha shtetërore.

Pushtetet vendore do të lejohen të përdorin obligacione speciale për të blerë tokë të papërdorur, duke rritur aftësinë e tyre për të menaxhuar ofertën e tokës dhe për të lehtësuar likuiditetin dhe presionet e borxhit si mbi qeveritë vendore ashtu edhe për zhvilluesit e pronave. Qeveria po studion politikat për tatimin mbi vlerën e shtuar që lidhen me pronat e banimit dhe po shikon politika të tjera tatimore për të mbështetur tregun e pronave.

Kina e ka vendosur deficitin buxhetor të këtij viti në 3% të Prodhimit të Brendshëm Bruto, një reduktim nga 3.8% i vitit të kaluar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.