Italia, 3.5 mld euro nga bankat për buxhetin – Meloni njofton rritjen e deficitit buxhetor, masa të reja për ndihmën sociale

Kristi Ceta/SCAN

 

Qeveria e Italisë planifikon të mbledhë 3.5 miliardë euro nga bankat dhe kompanitë e siguruesimit vendase, tha kryeministrja Giorgia Meloni pasi kabineti i saj miratoi planet buxhetore për tre vitet e ardhshme. Paratë e mbledhura do të caktohen për shërbimin shëndetësor kombëtar dhe për shtresat më të rrezikuara.

Zyrtarët thanë më parë se taksa mbi sektorin financiar do të rrjedhë nga një ndryshim në taksimin e opsioneve të aksioneve për menaxherët dhe në rregullat e kredive tatimore të bankave që rrjedhin nga humbjet e kaluara, të njohura si asete tatimore të shtyra.

Thesari tha në një deklaratë se buxheti për vitin 2025 përfshin masa me vlerë 30 miliardë euro, kryesisht shkurtime të përhershme të tatimit mbi të ardhurat dhe kontributet sociale për personat me të ardhura të mesme dhe të ulëta. Roma tha se do të zgjeronte deficitin e vitit të ardhshëm në 3.3% të Produktit të Brendshëm Bruto nga 2.9% që ishte vlerësuar bazuar në tendencat aktuale, duke marrë hua 9 miliardë euro shtesë për të financuar paketën.

Vitin e kaluar, Italia tronditi tregjet duke vendosur një taksë prej 40% mbi fitimet e papritura të bankave, vetëm për t’u tërhequr duke kufizuar qëllimin e taksës dhe duke u dhënë huadhënësve një klauzolë përjashtimi. Për vitin 2025, qeveria planifikon gjithashtu të rrisë akcizat për naftën dhe të eliminojë disa lehtësi tatimore për kompanitë që lidhen me taksën kryesore të korporatës IRES, sipas zyrtarëve.

Italia është nën një procedurë disiplinore të BE-së për shkak të një deficiti buxhetor vitin e kaluar prej 7.2% të Prodhimit të Brendshëm Bruto, shumë mbi kufirin prej 3% të bllokut dhe më i larti në zonën e euros. Muajin e kaluar qeveria u zotua të ulte deficitin në 2.8% të PBB-së në vitin 2026, duke shpresuar se kjo do t’i lejonte Italisë të dilte nga procedura në 2027.

Nga ana tjetër, borxhi i Italisë, tashmë i dyti më i lartë në eurozonë, shihet duke u rritur gradualisht gjatë dy viteve të ardhshme, duke arritur në 137.8% të PBB-së në 2026 krahasuar me 134.8% të vitit të kaluar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.