Makineri e re për hekurudhën Tiranë-Durrës-Rinas – Balluku: Standard i lartë punimesh për një udhëtim të rehatshëm
Ernilda Luzi/ Scan
Në Shqipëri ka mbërritur makineria moderne, Tamping e cila do t’i japë një hov punimeve për linjën hekurudhore Tiranë-Durrës-Rinas. Punimet për këtë linjë kanë hyrë në një fazë të re.
Makineria që njihet me emrin ndryshe makineria “rrahëse”, është vetëlëvizëse e montuar në hekurudhë. Ajo përdoret për të paketuar/shtypur çakëllin/ballastin e binarëve nën shinat, duke i bërë ato më të qëndrueshme dhe në nivel. Makineritë rrafëse janë thelbësore për përdorimin e traversave të betonit, pasi ato janë shumë të rënda (zakonisht mbi 250 kg).
Gjithashtu, Tamping korrigjon shtrirjen e shinave për t’i bërë ato paralele dhe në nivel, në mënyrë që të arrihet një udhëtim më i rehatshëm për pasagjerët dhe mallrat, nënvizon zv.kryeministrja njëheresh ministër e Infrastrukturës dhe Energjisë, Belinda Balluku.
Linja hekurudhore Tiranë-Durrës-Rinas do të jetë një linjë tërësisht elektrike, me një impakt të rëndësishëm në fushën e transportit në vend.
Përfitimet nga operimi i kësaj linje hekurudhore pritet të jenë të mëdha. Sipas raportit teknik “Një vlerësim i qëndrueshëm i aseteve të hekurudhës Tiranë – Durrës”, i realizuar nga Instituti Ndërkombëtar për Zhvillim të Qëndrueshëm, përfitimet kumulative neto për një periudhë 30- vjeçare përllogariten në 270.34 mln euro, duke zbritur kostot e investimit.
Vënia në funksion e kësaj linje pritet t’i japë një hov transportit hekurudhor në Shqipëri, duke sjellë jo vetëm ulje të kostove të transportit për udhëtarët dhe mallrat, por edhe ulje të ndjeshme të emetimeve të gazeve me efekt serrë e rrjedhimisht përfitime mjedisore dhe shëndetësore.
Punimet për ndërtimin e kësaj linje hekurudhore kanë filluar në nëntor 2021 dhe parashikojnë rehabilitimin e rreth 34,3 km linje ekzistuese nga Tirana në Portin e Durrësit. Ndërsa, një segment i ri 6.4 km i gjatë po ndërtohet për të lidhur qytetin e Tiranës me Aeroportin Ndërkombëtar të Rinasit.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.