Google, marrëveshje për energjinë bërthamore – Kompania kërkon burime të reja për të furnizuar qendrat e të dhënave

Kristi Ceta/SCAN

Në një përpjekje të re për të furnizuar qendrat e të dhënave të inteligjencës artificiale me energji të pastër, Google ka vendosur të përdorë energjinë bërthamore, duke nënshkruar një partneritet me Kairos Power. Kjo kompani me bazë në SHBA po zhvillon reaktorë të vegjël modularë.

“Ne po nënshkruajmë marrëveshjen e parë në botë për të blerë energji bërthamore nga reaktorë të shumtë të vegjël modularë (SMR) që do të zhvillohen nga Kairos Power,” tha Google në një deklaratë.

Reaktori i parë i tillë për të furnizuar qendrat e të dhënave të Google pritet të jetë funksional deri në vitin 2030, i ndjekur nga vendosje të reaktorëve të tjerë deri në vitin 2035.

Google shtoi se marrëveshja do të mundësojë deri në 500 MW energji të re pa karbon në rrjetet elektrike të SHBA. Kjo është e mjaftueshme për të furnizuar rreth 360,000 shtëpi në vit. Sipas kompanisë, rrjetit i duhen burime të reja të energjisë elektrike për të mbështetur teknologjinë e re.

Qendrat e të dhënave janë zemra e ekonomisë digjitale dhe konsumi i tyre i përgjithshëm i energjisë pritet të dyfishohet midis 2023 dhe 2028 duke arritur në 857 Terawatt orë (TWh) deri në fund të kësaj periudhe.

Kairos Power ka zhvilluar reaktorë të vegjël modularë që përdorin një sistem ftohjeje me kripë të shkrirë (në vend të ujit), duke premtuar kohë më të shkurtër ndërtimi dhe zgjidhje më të adaptueshme për nevojat e lokalizuara.

Këtë verë, Kairos Power realizoi reaktorin demonstrues në Tenesi, projekti i parë i tillë që mori një leje ndërtimi nga Komisioni Rregullator Bërthamor i SHBA.

“Kjo marrëveshje ndihmon në përshpejtimin e një teknologjie të re për të përmbushur nevojat e energjisë në mënyrë të pastër dhe të besueshme, dhe çlirimin e potencialit të plotë të inteligjencës artificiale,” shtoi Google.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.