“Turizmi dhe ndërtimi do të nxisin ekonominë” – Raporti i BB: Rritje 3,3% për 2024. Ja rreziqet potenciale

Dorian Koça/SCAN

 

Rritja ekonomike e Shqipërisë pritet të mbetet e qëndrueshme në 3.3 për qind në vitin 2024. Në raportin e rregullt ekonomik për vendet e Ballkanit Perëndimor të Bankës Botërore, sa i takon Shqipërisë theksohet se, turizmi dhe ndërtimi pritet të nxisin eksportet, konsumin dhe rritjen e investimeve me ritme të ngjashme me periudhën para pandemisë.

Norma e inflacionit parashikohet të mbetet nën nivelin e objektivit 3 për qind në periudhë afatmesme, pavarësisht rritjes së pagave, që pjesërisht kompensohet nga mbiçmimi i lekut.

Banka Botërore parashikon që deficiti i llogarisë korente pritet të qëndrojnë në 3.8 për qind të PBB-së në periudhë afatmesme. Me pritshmëritë për rritje rritje më të lartë të ekonomisë, varfëria parashikohet gjithashtu të ulet. Ndërkohë, bilanci primar parashikohet të përmirësohet dhe të arrijë zero për qind të PBB-së nga viti 2024 e tutje.

Sipas institucionit financiar ndërkombëtar me bazë në Uashington, qeveria shqiptare planifikon të vazhdojë përmirësimin e administratës tatimore, siç është parashikuar në Strategjinë Afatmesme të të Ardhurave dhe borxhi publik pritet të bjerë më tej në periudhë afatmesme.

Banka Botërore verën se treguesit kryesorë janë duke performuar për lart. Kështu, ka një sektor turizmi të fortë, rritje të aktivitetit ndërtimor, zgjerim të kreditimit, ndjesi positive e biznesit dhe konsumatorit, si dhe të ardhura të forta tatimore.

Duke pasur parasysh varësinë në rritje të Shqipërisë për financim nga jashtë, rreziqet që lidhen me kursin e këmbimit, norma e interesit dhe rifinancimi mbeten të larta.

Si një ekonomi e vogël dhe e hapur, Shqipëria është shumë e ekspozuar ndaj goditjeve të jashtme, të tilla si një recesion në BE, ose shtrëngim të mëtejshëm të kushteve të financimit në tregjet ndërkombëtare të kapitalit.

Rreziqet për rritjen ekonomike burojnë nga fatkeqësitë natyrore dhe kushte të pafavorshme globale (përfshirë zhvillimet gjeopolitike). Rreziqet fiskale burojnë nga partneritetet publike-private dhe ndërmarrjet shtetërore, si dhe nga sektori I energjisë thuajse tërësisht i varur nga hidrocentralet, për shkak të ndryshimeve klimatike.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.