Inflacioni i Shtatorit, një vend larg kufirit të BE-së – Norma e vlerësuar sipas metodës së Eurostat arriti në 2.3%

Xhorxhina Deda/SCAN

 

Indeksi i Harmonizuar i Çmimeve të Konsumit, që mat rritjen e çmimeve sipas metodologjisë së ‘Agjencisë Europiane të Statistikave’, në muajin Shtator të vitit 2024 regjistrohet në 2.3%. Nga të dhënat rikujtojmë se inflacioni po për të njejtin muaj të këtij viti sipas metodologjisë së ‘INSTAT’ është 1.9%. Rikujtojmë se në të dyja rastet inflacioni përllogaritet nga i njëjti institucion, por ka diferenca të vogla për shkak të peshës që i jepet secilit grup në normën e inflacionit.

Krahasuar me vendet e tjera të Europës, Shqipëria renditet një pozicion larg kufirit mesatar të Bashkimit Europian. Këtë e pohojnë edhe shifrat e këtij treguesi për muajin Shtator, ku rezulton se mesatarja e rritjes së çmimeve në Europë për të njëjtin muaj regjistrohet në 2.1%. Malta është i vetmi vend që ka barazuar msataren e BE-së për muajin Shtator.

Ndërkohë, nga ana tjetër, vendet me normën më të lartë të çmimeve në Europë janë Rumania me 4.8%, Serbia me 4.3% dhe Belgjika po me 4.3%. Në nivel rajoni, më mirë së Shqipëria paraqitet Mali i Zi me një normë të rritjes së çmimeve deri në 1.4%. Nga ana tjetër, inflacioni në Maqedoninë e Veriut vlerësohet në 3.7%. Të dhënat tregojnë se në pjesën më të madhe të vendeve të marra në analizë kemi një zbutje të normës së inflacionit, por në Maqedoninë e Veriut ka ndodhur e kundërta në Shtator të këtij viti.

Nëse i referohemi grupeve kryesore, rritja më e madhe e çmimeve prej 4.0% vërehet në grupin “Argëtim dhe kulturë”, pasuar nga grupet “Ushqime dhe pije joalkoolike” me 3.7%, “Pije alkoolike dhe duhan” me 3.6%, “Veshje dhe këpucë” me 3.3%, “Mobilim, pajisje shtëpie dhe mirëmbajtje” me 2.6%, “Hotele, kafene dhe restorante” me 2.1%, “Mallra dhe shërbime të ndryshme” me 2.0%, “Shëndeti” me 1.7%, “Qira, ujë, lëndë djegëse dhe energji” me 1.3%, “Shërbimi arsimor” me 1.2%, “Komunikimi” me 0.8%. Nga ana tjetër, çmimet e grupit “Transporti” u ulën me 2.5%.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.