Artistja e Kosovës shndërron veshjet në çanta – Nisma e veçantë synon të rrisë ndërgjegjësimin për kancerin e gjirit

Kristi Ceta/SCAN

 

Në një ditë me diell tetori në Prishtinë, gratë rreshtohen pranë një tezge për të dhuruar sutiena që më pas do të shndërrohen në çanta. Kjo nismë synon të mbledhë para për personat me kancer gjiri, si pjesë e një projekti të nisur nga artistja Ermira Murati për të rritur ndërgjegjësimin e grave të Kosovës.

Për të katërtin vit radhazi në tetor, Murati po vijon me projektin e saj origjinal. Çantat e krijuara me sutiena në të gjitha madhësitë dhe ngjyrat shfaqen më pas në rrjetet sociale. Me paratë e mbledhura nga shitja e tyre, Murati blen sutiena që shërbejnë pas mastektomisë, të cilat kanë xhepa të brendshëm për të mbajtur protezat e gjoksit.

“Mund t’i vishni sutienat si çantë. Kjo do të thotë që ju mund t’i përdorni ato në një mënyrë tjetër edhe më kuptimplotë,” tha Murati.

Sipas të dhënave të Ministrisë së Shëndetësisë së Kosovës, në vitin 2022 janë regjistruar rreth 547 raste të reja të kancerit të gjirit në Kosovë.

Murati njihet në Kosovë për punën e saj provokuese. Dy projektet e saj të mëparshme, njëri që tregon dy burra me veshje kombëtare shqiptare duke u puthur me njëri-tjetrin dhe tjetri që tregon një lider nga Kosova dhe një serb duke u puthur, gjithashtu kanë tërhequr kritika.

“Ajo që po bëj është shumë provokuese. Nuk krijon ndjesinë e rehatisë për shumë njerëz,” shprehet artistja teksa krijon çanta në një studio vetëm pak metra larg xhamisë kryesore në Prishtinë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.